Kompania Bankers Petroleum bëri të ditur se u detyrua të pezullojë punën në 81 puse me 3500 fuçi në ditë si pasojë e përmbytjeve ndërsa ka ulur për herë të dytë planin e investimeve për vitin 2015.
Kompania Bankers Petroleum uli planin e investimeve për vitin 2015 nga 216 milionë dollarë në në 153 milionë dollarë si pasojë e çmimit të ulët të naftës në tregun ndërkombëtar. Kompania bëri të ditur në një njoftim për investitorët e vet se plani i mëparshëm i njoftuar dhjetorin e kaluar bazohej në parashikimin se çmimi i naftës në bursën e Londrës për këtë vit do të varionte në rreth 70 dollarë për fuçi ndërsa parashikimi i ri është që çmimi mesatar të jetë rreth 50 dollarë për fuçi.
“Ne besojmë se [plani i rishikuar i investimeve] është i kujdesshëm me parashikimin aktual të çmimeve dhe demonstron disiplinën tonë për investime si dhe ruan bilancin e fortë tonin,” deklaroi drejtori ekzekutiv i kompanisë David French. “Projekti ynë është mjaftueshëm fleksibël për të na lejuar të zgjedhim vetë ritmin dhe shkallën e zhvillimit,” shtoi ai.
Bankers vendosi të ngadalësojë punën për shpimet e reja dhjetorin e kaluar si pasojë e rënies së shpejtë të të ardhurave nga shitja e naftës bruto që nxjerr në fushën e Patos-Marinzës pranë Fierit. Nxjerrja e naftës në Shqipëri nxirret në vendburime të zbuluara dekada më parë dhe që e kanë kaluar pikun e prodhimit me metodat konvencionale të nxjerrjes. Përdorimi i metodave dytësore të nxjerrjes është i kushtueshëm, gjë që do të thotë se shpimet e reja nuk janë me leverdi në rast se çmimi në tregun ndërkombëtar është më i ulët se 70 USD. Mungesa e çmimeve të reja sjell gjithashtu rënie graduale të prodhimit, rënie që në disa puse mund të arrijë edhe deri në 30 për qind në vit.
Ndërkohë, kompania realizoi në muajin janar një prodhim pak më të ulët se sa në dhjetor. Prodhimi mesatar ditor gjatë janarit qe 20,154 fuçi nga 20,324 fuçi në ditë që qe mesatarja e tremujorit të fundit 2014.
Përmbytjet që prekën Shqipërinë e jugut në fillim të muajit shkurt detyruan kompaninë të ndërpresë punën në 81 puse me prodhim të përgjithshëm ditor prej rreth 3500 fuçish. Puset u rikthyen në punë pas tërheqjes së ujërave të lumenjve.
Rënia e çmimeve të naftës në tregun ndërkombëtar pritet të ndihmojë pak ekonominë shqiptare sa i përket kostos së importit të karburanteve dhe kostos së përdorimit të karburanteve nga konsumatorët. Ndërkohë, Shqipëria pritet të vuajë nga rënia e investimeve në industrinë e vet të naftës si dhe nga të ardhurat e munguara nga renta minerare në buxhetin e shtetit.
