Një inspektim i institucioneve të kujdesit shëndetësor në Malin e Zi ka zbuluar probleme madhore me higjienën.
Një akuzë përcëlluese për gjendjen e pastërtisë në të gjitha 15 spitalet malazeze u bë publike të mërkurën duke treguar praninë e baktereve të rrezikshme dhe standardet e dobëta të higjienës.
Nga më shumë se 400 monstrat e analizuara të marra në nëntor dhe dhjetor, më shumë se 30 për qind kishin baktere, raportoi media.
Situata më e rëndë u gjet në spitalin e përgjithshëm në Niksic, ku përveç se te sipërfaqet klinike, bakteret u gjetën edhe te punonjësit. Spitalet në qytetet e Bijelo Polje dhe Pljevlja, të dyja në veri të vendit, kryesojnë listën.
Dy spitale private u monitoruan gjithashtu, ku disa mostra dolën pozitive në testet për baktere.
Ministria e Shëndetit nëntorin e shkuar udhëroi kontrollin e plotë të kushteve higjienike në institucionet publike të shëndetit pasi një virus vdekjeprurës mori jetën e një foshnje në një spital në veri dhe katër të tjerë u infektuan.
Doktorët konfirmuan se bebet kishin marrë sepsis dhe meningjit nga një infeksion.
Pasi shpërtheu skandali, ministri i shëndetësisë Miodrag Radunovic dha dorëheqjen, drejtuesit e maternitetit në Bijelo Polje u larguan dhe prokuroria e shtetit hapi një hetim për të përcaktuar përgjegjësinë për infeksionet.
Ministria e Shëndetësisë ka heshtur për zbulimet e fundit të infeksioneve në spitale, por komiteti parlamentar për shëndetësinë ka lajmëruar se do të këmbëngulë që autoritetet të përcaktojnë kush është përgjegjës për problemet.
Ata gjithashtu nxitën autoritetet e inspektimit të kontrollojnë spitalet më shpesh në të ardhmen, në mënyrë që të parandalohen infektimet e reja.
“Do të dorëzoj një iniciativë duke kërkuar rizgjedhjen e mënjëhershme të drejtorëve të të gjithë institucioneve të kujdesit shëndetësor në Malin e Zi,” tha një anëtare e komitetit, Zorica Kovacevic për TV Vijesti.