Ministria e Financave njoftoi se bordi i drejtorëve dha miratimin për 53 milionë euro më 20 shkurt. Kredia pati mbetur pezull shtatorin e kaluar.
Ministria e Financave e Shqipërisë njoftoi të dielën se Fondi Monetar Ndërkombëtar ka dhënë miratimin final për Rishikimin e Dytë dhe të Tretë të marrëveshjes me Shqipërinë duke i hapur rrugën disbursimit të dy kësteve të kredisë me vlerë të përgjithshme prej 53 milionë eurosh.
“Bordi Ekzekutiv i Fondit Monetar Ndërkombëtar (FMN) miratoi në datën 20 Shkurt 2015 rishikimin e dytë dhe të tretë të marrëveshjes të nënshkruar me FMN vitin e kaluar,” njoftoi Ministria e Financave.
Shqipëria nënshkroi një marrëveshje ndihme me FMN-në në dhjetor 2013, në bazë të së cilës, premtoi se do të ndërmarrë reforma për reduktimin e borxhit publik në këmbim të mbështetjes me kredi nga FMN dhe Banka Botërore. Marrëveshja me FMN parashikon një kredi të përgjithshme prej afro 330 milionë eurosh të ndarë në nëntë këste për tre vjet.
Pas lëvrimit të këstit të dytë të kredisë në qershor 2014, marrëdhëniet mes Shqipërisë dhe FMN-së u tensionuan si pasojë e ngurrimit të qeverisë shqiptare për të ndërmarrë politika të mëtejshme shtrënguese. Një mision i fondit në shtator 2014 u largua pa marrëveshje. Për rrjedhojë, qeveria shqiptare u detyrua të ndryshojë buxhetin dhe të zëvendësojë kredinë e pritshme nga FMN me borxh të brendshëm.
Në nëntor, misioni i FMN njoftoi se kishte rënë dakord me Shqipërinë në nivel stafi ndërsa bordi i FMN-së pritej të jepte miratimin final në fund të janarit.
Para arritjes së marrëveshjes, qeveria shqiptare miratoi një paketë fiskale që përfshinte rritjen e barrës fiskale mbi ekonominë shqiptare me rreth 112 milionë euro për vitin 2015 në krahasim me vitin 2014. Rritja e barrës fiskale u realizua përmes rritjes së taksës së qarkullimit mbi karburantet nga 17, në 27 lekë për litër, rritjen e akcizës së cigareve nga 90 në 110 lekë për paketë dhe rritjen e tatimit mbi të ardhurat personale nga 10 në 15 për qind.
Ndërkohë, qeveria miratoi ndryshime në ligjin për pensionet duke i hapur rrugën rritjes graduale të moshës së daljes në pension ndërkohë që Enti Rregullator i Energjisë miratoi çmime më të larta për energjinë elektrike të disa kategorive.
Qeveria ka parashikuar rritjen e të ardhurave buxhetore për vitin 2015 në 414 miliardë lekë (2.96 miliardë euro), me rritje prej 47.7 miliardë lekësh në krahasim me vitin 2014. Sipas marrëveshjes me Fondin Monetar Ndërkombëtar, borxhi publik i Shqipërisë pritet të arrijë kulmin këtë vit dhe të shënojë rënie të shpejtë në tri vitet në vazhdim.