OJQ-të, politikanët e opozitës dhe disa vendas në Gjirin e Kotorrit janë kundër planeve për të kthyer një fortesë habsbuge të shekullit të 19 në një hotel me pesë yje.
Një politikan malazez i opozitës akuzoi të mërkurën qeverinë për trajtimin e trashëgimisë kulturore kombëtare si një ‘treg i mallrave’ pasi fortesën austro-hungareze Mamula në bregdet u ofrua me qira për një kompleks turistik luksoz.
Goran Tuponja, deputet i Partisë Pozitive, tha se qeveria e kishte trajtuar fortesën Mamula si të ishte furnizim zyre i ofruar në një tender publik.
“Ne nuk mund ta trajtojmë trashëgiminë tonë kulturore në atë mënyrë dhe të presim që dikush që vjen nga cepi tjetër i botës ta respektojë më shumë se ne,” tha ai.
Fortesa në ishullin Lastavica, e lokalizuar në hyrje të Gjirit të Kotorrit, pranë rezortit bregdetar të Herceg Novi, është ndërtuar nga Austro-Hungaria në shekullin e 19. Është përdorur kryesisht si një burg gjatë luftërave botërore.
Për vite, fortesa shërbeu si një monument kulture, duke tërhequr mijëra vizitorë çdo verë.
Pas nëntë muajsh negociata, ministri i turizmit, Branimir Gvozdenovic dhe kryetari i kompanisë Orascom me bazë në Zvicër nënshkruan një kontratë për qiradhënien afatgjatë të ishullit, përfshirë fortesën Mamula.
Kontrata është për 39 vjet dhe përfshin një obligim prej Orascom të investojë 15 milionë euro gjatë viteve të ardhshme. Kompania zvicerane planifikon të rikonstruktojë fortesën Mamula si hotel me pesë hyje me 23 dhoma me spa, marinë luksoze, vend për uljen e helikopterëve, pishinë dhe kazino.
“Ne do të kemi një dhomë speciale përkujtimore, që do të promovojë historinë e ishullit dhe fortesës së tij. Kështu, ne duam të freskojmë ofertën tonë turistike dhe të mbrojmë trashëgiminë kulturore,” tha ministri.
Ndërsa projekti i qiradhënies së ishullit Lastavica pret miratim në parlament, disa organizata mjedisore dhe një lidhje qytetarësh kanë kritikuar vendim për të dhënë me qira një monument historik.
Lidhja Boka tha se askush nuk ishte kundër rikonstruktimit dhe promovimit si një kompleks përkujtimor, ku më shumë se 2000 vendas u burgosën gjatë Luftës së Dytë Botërore, por ishte kundër planeve për ta kthyer fortesën në një hotel me një kazino.
Në verën e vitit 2014, mijëra njerëz nga zonat bregdetare të Malit të Zi protestuan për disa ditë pasi u zbulua plani i qiradhënies së fortesës.
