Qyteti i vogël me shumicë serbe i Ranillugës është detyruar të rishqyrtojë planin e tij për t’i vënë një rruge emrin e ish-liderit serb Sllobodan Millosheviç pasi ky propozim u kritikua ashpër.
Kryetari i komunës së Ranillugës në Kosovën lindore tha ditën e hënë se ai ka urdhëruar një rishikim të vendimit për t’i vënë një rruge emrin e Millosheviçit, i cili është i përçmuar gjerësisht nga shqiptarët e Kosovës për politikat e tij represive në ish-provincën Beogradit.
Kryetari i komunës Gradimir Mikic tha se ai nuk ishte përgjegjës për idenë e emërimit të rrugës sipas Millosheviçit.
“Unë nuk jam ai që e propozoi këtë, siç është sugjeruar në lajmet që u përhapën në Kosovë. Këtë e bëri një komision brenda komunës. Në këtë rast, përdora kompetencat e mia si kryetar dhe e kalova vendimin përsëri për rishqyrtim,” tha për BIRN Mikic.
Gazeta “Zeri i Prishtinës” kritikoi ashpër autoritetet komunale për planin për t’i vënë një rruge emrin e njeriut që ajo e përshkroi si “Kasapi i Ballkanit”.
Ministria e administrimit të pushtetit lokal të Kosovës tha gjithashtu se vendimi për të një rruge me emrin e Millosheviçit ishte i gabuar dhe nuk mund të zbatohej.
Ministria tha në një deklaratë të hënën se Agjencia Kadastrale e Kosovës ka sfiduar vendimin e komunës Ranillugë, “sepse përmban emra rrugësh që konsiderohen të papranueshme”.
Mikic, një anëtar i partisë Lëvizja për Ripërtëritjen Serbe, ishte përgjegjës katër vjet më parë për vendosjen e një tabele rrugore me emrin e Draza Mihajlovic, lideri i Lëvizjes Nacionaliste Çetnike gjatë Luftës së Dytë Botërore, në muret e jashtme të shtëpisë së tij në Raniluk.
Por ai tha se edhe emërtimi i rrugës pas Mihajlovicit do të rishqyrtohet.
“Kam kërkuar që të gjithë emrat e rrugëve të rishikohen. Këshilli komunal do të shqyrtojë këtë gjë,” tha ai.
Ranilluga u bë komunë në vitin 2010 përmes planit të negociatorit të OKB-së Marti Ahtisaari për statusin e pas luftës së Kosovës.
Millosheviçi vdiq në paraburgim në vitin 2006 para përfundimit të gjyqit të tij për krime lufte gjatë konfliktit të vitit 1999 në Kosovë, si dhe gjatë luftërave në Bosnje dhe Kroaci.
