Indeksi i çmimeve të konsumit u rrit në mbi 2 për qind për herë të parë në shumë kohë.
Çmimet shumë më të shrenjta të ushqimeve kryesore qenë përgjegjëset kryesore për rritjen e përgjithshme të Indeksit të Çmimeve të Konsumit në muajin shkurt, bëri të ditur Instituti i Statistikave. IÇK u rrit me 2.4 për qind në shkurt në krahasim me një vit më parë, kuota më e lartë e shënuar që nga shkurti i vitit 2013.
“Çmimet e grupit “Ushqime dhe pije joalkoolike” u rritën me 4,8 për qind. Brenda këtij grupi çmimet e nëngrupit “zarzavate përfshirë patatet” u rritën me 17,1 %, pasuar nga nëngrupi “fruta” me 11,4 për qind, “qumësht, djathë e vezë” me 3,0 për qind,” thuhet në njoftimin e INSTAT.
Indeksi i Çmimeve të Konsumit duhet të luhatet në rreth 3 për qind me një bandë plus minus 1 për qind, sipas objektivit të Bankës së Shqipërisë. Objektivi për inflacion rreth 3 për qind lidhet me procesin e përafrimit gradual të pagave dhe çmimeve me vendet e Bashkimit Europian. Kjo rritje duhet të ndodhë pa marrë parasysh ndryshimet që mund të shkaktohen nga inflacioni i importuar apo nga ndryshimet e nivelit të taksave në vend.
Inflacioni ka qëndruar nën minimumin prej 2 për qind që nga vera e vitit 2013, duke reflektuar gjendjen e dobët ekonomike të Shqipërisë. Për rrjedhojë, Banka e Shqipërisë ka ulur në mënyrë të vazhdueshme gjatë kësaj periudhe normën e vet të interesit për të furnizuar ekonominë me kredi më të lirë dhe për të përmirësuar kërkesën. Indeksi i Çmimeve të Konsumit mbeti i ulët pavarësisht rritjes së disa taksave nga ana e qeverisë në vitet 2014 dhe 2015, gjë që sugjeron se inflacioni real është edhe më i ulët nga ai që shfaqet në statistika.