Dimitris Avramopolous, komisioneri europian për Migrimin, lavdëroi rënien e numrit të emigrantëve ilegalë të Kosovës por sugjeroi që autoritetet tani duhet të kërkojnë shkaqet e këtij emigrimi masiv.
Komisioneri i BE-së për Migrimin, Çështjet e Brendshme dhe Nënshtetësinë, Dimitris Avramopoulos, lavdëroi rënien e shënuar gjatë ditëve të fundit në numrin e emigrantëve ilegalë nga Kosova në vendet e BE-së.
Duke folur gjatë një vizite në Kosovë të martën, ai tha: “kalimet e parregullta kufitare të identifikuara të nënshtetasve të Kosovës në kufirin mes Serbisë dhe Hungarisë kanë rënë gjatë muajit të fundit nga 1,400 në 15 në ditë. Kjo është një rënie spektakolare.”
Komisioneri tha se megjithëse fushata e fundit e ndërgjegjësimit në Kosovë mbi rreziqet e emigrimit ilegal duket se po rezulton e suksesshme, tashmë është koha për të menduar se “pse këta nënshtetas kanë vendosur të largohen dhe pse ata nuk shohin të ardhmen e tyre në Kosovë”.
Duke folur për çështjen e liberalizimit të vizave me BE-në, çështje që shihet si një faktor pas emigrimin ilegal nga Kosova, Avramopolous tha se Kosova po “ecën në kilometrin e fundit drejt heqjes së vizave,” por se korrupsioni dhe krimi i organizuar duhej të luftoheshin me më shumë seriozitet.
“Vetëm me rezultate reale në korrupsionin e nivelit të lartë dhe në çështjet e krimit të organizuar si dhe me masa të besueshme për të parandaluar përsëritjen e krizës aktuale të migrimit unë do të jem personalisht në gjendje të mbështes kërkesën për vendet anëtare që nënshtetasit e Kosovës të fitojnë me të vërtetë statusin e liberalizimit të vizave,” tha Avramopolous.
Kosova përjetoi një dallgë emigrimi ilegal drejt vendeve të BE-së gjatë muajve të fundit. Kosovarët nga shtresa të ndryshme të popullsisë kaluan ilegalisht kufirin mes Serbisë dhe Hungarisë me shpresë se do të gjejnë azil në vendet e BE-së – më së shumti në Gjermani dhe Austri.
Shumica e aplikimeve për azil refuzohen me parimin se Kosova është një vend i sigurtë dhe se emigrimi i tyre është shkaktuar nga problemet ekonomike dhe jo nga pretendimet për persekutim.
