Një OJQ kosovare për të drejtat e njeriut ka bërë thirrje për largimin e një kryetari të një komune me shumicë serbe, i cili propozoi emërtimin e një rruge sipas liderit serb Sllobondan Millosheviç.
Këshilli për Mbrojtjen e të Drejtave dhe liritë e Njeriut, një OJQ me bazë në Prishtinë, bëri thirrje të martën për largimin e menjëhershëm të
kryetarit të komunës së minoritetit serb të Ranillugës pasi plani për të nderuar Millosheviçin shkaktoi zemërim.
“Kryetari i Ranillugës duhet të hiqet urgjentisht dhe duhet të përballet me ligjin” tha kryetari i këshillit, Behxhet Shala, në një deklaratë.
“Një veprim i tillë nxit urrejtje ndëretnike dhe një veprim i tillë do të dëmtojë më së shumti komunitetin serb [në Kosovë],” shtoi ai.
Deklarata gjithashtu tha se komuniteti serb duhet të dënojë planin si ‘nacionalist dhe shovinist’.
Kryetari, Gradimir Mikiç, ka distancuar veten nga incidenti pasi fotot e një tabele rruge mbanin emrin e ish-presidentit serb, u publikuan nga media e Kosovës dhe nxitën zemërim.
Mikiç fajësoi një komision në komunë për vendimin dhe tha se ai kishte urdhëruar të rishikohej.
Slobodan Petrovic, një politikan serb dhe anëtar i parlamentit të Kosovës, ka dënuar vendimin për të emërtuar një rrugë sipas Millosheviçit, duke thënë se ‘duhet të analizohet, që të shihen përfitimet’.
“Politikanët janë aty për të siguruar se qytetarët në atë komunë të përfitojnë dhe jo të shkaktojnë ndasi midis komuniteteve në Kosovë,” tha ai.
Ministria për Administrimin e Qeverisjes Vendore, që mbikëqyr qeverisjen vendore në komunat që janë të decentralizuara nga qeveria e Prishtinës, tha se po përpilon një ‘listë të zezë’ të emrave që nuk mund të përdoren për rrugët në Kosovë.
Kryetari Mikiç ka thënë se ai do të rikonsiderojë emërtimin e një prej rrugëve në Ranillugë sipas Draza Mihajlovic, liderit të lëvizjes nacionaliste çetnike të periudhës së Luftës së Dytë Botërore.
Millosheviçi vdiq në paraburgim në vitin 2006 para përfundimit të gjyqit të tij për krime lufte gjatë konfliktit të vitit 1999 në Kosovë, si dhe gjatë luftërave në Bosnje dhe Kroaci.