Opozita maqedonase tha se të martën në mbrëmje do të publikojë bisedat reja të regjistruara që ofrojnë provat më të forta të zbuluara deri tani për mashtrim të qeverisë gjatë zgjedhjeve.
Zoran Zaev, kryetari i Partisë Social Demokrate të opozitës, SDSM, u bëri thirrje njerëzve t’i bashkohen partisë kur ajo të zbulojë ato që premtojnë se do të jenë “shembujt më të rëndësishëm, më fyes dhe më skandalozë” të mashtrimit elektoral të kryer nga kryeministri Nikolla Gruevski dhe partia e tij në pushtet, partia VMRO DPMNE.
Ndryshe nga publikimet e mëparshme të bisedave të regjistruara, të cilat u zhvilluan në selinë e partisë së opozitës, ngjarja e ditës së martë është planifikuar për Sallën Universale të Shkupit, një sallë koncertesh që mund të akomodojë 1,500 njerëz.
SDSM-ja tha se “vendet nuk janë të rezervuara për aktivistët partiak dhe nuk ka ftesa të veçanta. Hyrja do të jetë falas për të gjithë njerëzit të cilët dëshirojnë të vijnë.
Për shkak të nivelit të pritur të interesit publik, partia tha se do të ngrihen ekrane jashtë sallës për njerëzit që nuk mund të hyjnë për të parë.
Mitingu u njoftua ditën e premte, kur opozita publikoi biseda të regjistruara të cilat tregojnë mashtrim serioz elektoral gjatë zgjedhjeve të kaluara, përfshirë edhe përdorimin e votuesve fiktivë, kartave të rreme identiteti, presionin mbi individë dhe firma, keqpërdorim të policisë dhe administratës dhe mjete të tjera.
Burime nga SDSM-ja thanë për BIRN se Zaevi mund ta përdorë ngjarjen e së martës për të zbuluar “propozimin-platformë” të partisë për nxjerrjen e Maqedonisë nga kriza aktuale.
Kjo parashikon formimin e një qeverie tranzicionale të përbërë nga ekspertë dhe njerëz jo-partizane të ngarkuar për përgatitjen e vendit për zgjedhje të rregullta.
Opozita filloi të tregonte biseda të regjistruara më 9 shkurt. Zaevi pohoi se qeveria kishte regjistruar më shumë se 20, 00 persona në vendin e përbërë nga 2 milion banorë. Ai tha se përgjimi ishte orkestruar nga kryeministri Nikolla Gruevski dhe nga shefi i policisë sekrete, Saso Mijalkov.
Opozita thotë se kasetat vërtetojnë përfshirjen e Gruevskit dhe Mijalkovit në skemat penale, intimidim, kontroll të gjerë të gjyqësorit dhe medias dhe në mashtrimin zgjedhor ndër çështje të tjera.
Gruevski, i cili është në pushtet që nga viti 2006, i ka mohuar akuzat, duke këmbëngulur se opozita e ka marrë materialin nga “shërbime të huaja sekrete” pa emër. Lideri i opozitës, Zaevi, po hetohet për akuza për grusht shteti.
Gruevski dhe ministrat e tjerë nuk e kanë mohuar vërtetësinë e kasetave të bëra publike dhe nuk kanë pranuar të komentojnë mbi përmbajtjen e tyre.