Njëzet gra që vuajnë dënimin në burgun ‘Ali Demi’ në Tiranë do të marrin pjesë të dielën në premierën e opreas “Dasma e Figaros”, me muzikë nga Mozart në Teatrin Kombëtar të Operas dhe Baletit.
“Ftesa, që vjen për herë të parë, është bërë nga vetë regjisori Nikolin Gurakuqi dhe mbështetur nga Drejtori i TKOB, z. Ilir Kerni,” tha në një njoftim për shtyp drejtoria e përgjithshme e burgjeve.
“Gjithashtu, edhe Drejtori i Përgjithshem i Burgjeve, z. Artur Zoto, e mirëpriti idenë, e cila është në përputhje me vizionin e institucionit më të lartë të sistemit të burgjeve ne Shqipëri, që ka në fokus rehabilitimin më të shpejtë dhe riintegrimin normal në shoqëri të personave në konflikt me ligjin,” shtoi ajo.
‘Dasma e Figaros’ është një opera komike më katër akte me libret të Lorenzo da Ponte. Opera u shfaq për herë të parë në 1 Maj të vitit 1796 në Bugtheater të Vjenës dhe cilësohet si një nga gurët e themelit të repertorit operistik standard. Ajo listohet si një nga 10 operat më të shfaqura në nivel botëror.
“Teatri moxartian, i rafinuar, elegant, sarkastik, social, multidimensional, dhe mbi të gjitha shumë modern, dhe sa më shumë kalon koha aq më modern bëhet,” u shpreh regjisori Nikolin Gurakuqi.
“[Është] teatër i aksionit por edhe i meditimit të thellë, i konfliktit të ashpër social dhe i revoltës kundër abuzimit me pushtetin,i përqeshjes se dobësive njerëzore por edhe i faljes hyjnore,” shtoi.
Njëzet gratë pjesëmarrëse janë përzgjedhur në bazë të kritereve të besueshmërisë dhe zbatimit korrekt te rregullores në institucion, si një formë për të nxitur modelin e sjelljeve të mira.
Forcat e policisë së burgjeve do të shoqërojnë gratë përgjatë gjithë qëndrimit të tyre në shfaqjen premierë.