Bisedat e përgjuara të publikuara nga opozita maqedonase pretendojnë se krerët e shtetit kanë përdorur sipas interesit gjyqësorin në Maqedoni.
Kryeministri i Maqedonisë, ministrja e brendshme dhe shefi i policisë sekrete kanë manipuluar vazhdimisht me faktin se cilët gjykatës do të caktohen dhe ngrihen në detyrë – ose jo – në gjykatat maqedonase, tha të martën kreu i Partisë Social Demokrate SDSM, Zoran Zaev.
“Tre persona po caktojnë prokurorët dhe gjykatësit dhe po i luajnë si gurë shahu sipas kërkesave dhe dëshirave të tyre,” tha ai.
“Kjo ka përulur seriozisht një nga shtyllat e demokracisë, sundimin e ligjit,” shtoi Zaev.
“Si për ironi, bashkëpunëtorët e tyre ishin ministri i drejtësisë Blerim Bexheti dhe zëvendës kryeministri Musa Xhaferi, nga Bashkimi Demokratik për Integrim, BDI, një parti në koalicionin qeverisës,” shtoi Zaev.
Përgjimet e sapopublikuara sugjerojnë se ministrja e brendshme Jankuloska mbante një listë të gjyqtarëve të përshtatshëm dhe të papërshtatshëm përpara saj, duke dhënë urdhra se kush do të ngrihej në detyrë dhe kush do të ndalohej nga caktimi në pozicione të larta.
Bisedat e supozuara të ministres së brendshme dhe shefit të policisë sekrete u transmetuan teksa diskutonin për këtë subjekt.
Zëri i Mijalkov dëgjohet teksa i thotë gjykatëses Sofija Lalicic që do të rritët së shpejti në detyrë, por të mos i thotë askujt.
Zëri i vëllait të tij, Vlatko Mijalkov, një zyrtar i lartë në zyrën e doganës, dëgjohet teksa kërkon një nder në gjykatë nga Filimena Manevska, ish-gjykatëse e apelit në Shkup dhe grua e ish-ministrit të drejtësisë Mihajlo Manevski.
Në një tjetër përgjim, zëri që mendohet se i përket ministrit të shëndetësisë, Nikola Todorov i kërkon Jankuloskas të manipulojë zgjedhjen e një gjyqtari.
Jankuloska thotë se të gjitha listat janë mbyllur – por ajo do ta mbajë emrin e gjykatësit në mendje për zgjedhjet e ardhshme.
Një tjetër përgjim përfshin zërin e shefit të policisë sekrete Mijalkov, teksa telefonon një grua që aplikon për gjykatëse. “Duhet të të bëjmë ty një gjykatëse apo jo?” pyet ai. Ajo përgjigjet se nëse caktohet do të jetë “mirënjohëse përjetë”.
Në një bisedë tjetër ministri i financave Zoran Stavreski i kërkon Jankuloskas t’i japë një mësim një punonjësi provokues në ministrinë e tij që po aplikon për postin e gjykatësit.
“Dua t’ia bëj jetën ferr, por nuk dua të jetë e qartë që jam unë… nuk e bëj këtë shpesh por ai ka qenë acarues që nga fillimi duke i bërë gjërat sipas mendjes, nuk e ka mësuar leksionin e tij,” ankohet zëri.
Në një bisedë në shqip midis ministrit të drejtësisë Blerim Bexheti dhe zv. Kryeministrit Musa Xhaferi, ata ankohen se i janë dorëzuar shumë VMRO DPMNE kur vjen puna për caktimin e gjyqtarëve, ndërsa bien dakord se ata mund të përfitojnë gjithashtu nga praktika.
“Kjo është panorama e vërtetë e gjyqësorit të kontrolluar në Maqedoni… vendimet e gjykatave nuk merren, por porositen,” tha Zaev në konferencën për shtyp.
“Jemi të gjithë në gojën e përbindëshit. Le të mos lejojmë që të na hajë. Le ta ndalim një herë e përgjithmonë,” shtoi ai.
Kjo ishte konferenca e 12 e partisë për publikimi e mbikëqyrjes së paligjshme në Maqedoni në të cilën SDSM ka akuzuar kryeministrin dhe liderin e partisë qeverisëse Gruevski se ka orkestruar mbikëqyrjen e 20,000 njerëzve.
SDSM thotë se e ka marrë materialin nga burimet brenda shërbimeve sekrete maqedonase. Gruevski ka këmbëngulur se përgjimet janë krijuar nga shërbime të huaja në bashkëpunim me opozitën që të destabilizojnë vendin.
