Shtetet e Bashkuara e konsiderojnë rastin e dy deputetëve si mundësi për të demonstruar se asnjë individ nuk qëndron mbi ligjin.
Në një deklaratë të publikuar pak orë pas kërkesës së prokurorisë për leje nga Kuvendi për arrestimin e deputetëve Tom Doshi dhe Mark Frroku, ambasada e Shteteve të Bashkuara të Amerikës në Tiranë deklaroi se e mirëpret veprimin e Prokurorisë dhe i bën thirrje institucioneve të vendit të sigurojnë proces ligjor në përputhje me ligjin.
“Ambasada e SHBA mirëpret veprimin e Prokurorisë së Përgjithshme për të kërkuar miratimin e parlamentit për të arrestuar dy deputetë. Kjo është një mundësi e rëndësishme për të demonstruar se asnjë individ nuk qëndron mbi ligjin,” deklaroi ambasada. “Ritheksojmë thirrjen tonë për Prokurorinë e Përgjithshme, Parlamentin dhe institucionet gjyqësore që të përmbushin përgjegjësitë e tyre për të siguruar proces ligjor të rregullt në përputhje me ligjin”, shtoi ajo.
Ambasada amerikane pati përshëndetur në datën 2 mars 2015 përjashtimin e Tom Doshit nga grupi parlamentar i Partisë Socialiste duke argumentuar se z.Doshi “pretendohet se është përfshirë në veprimtari kriminale”.
Prokuroria e Përgjithshme njoftoi mëngjesin e sotëm se i ka kërkuar Kuvendit të Shqipërisë leje për arrestimin e dy deputetëve pasi beson se disponon të dhëna se kanë kryer tre vepra penale, “Kallzimi i rremë”, “Kanosja për deklarime a dëshmi, ekspertim ose përkthim të rremë”, dhe “Deklaratat e rreme përpara Prokurorit”.
Kuvendi pritet të mblidhet javën tjetër për të shqyrtuar kërkesën. Sipas Kushtetutës, deputetët do të gjykohen nga Gjykata e Lartë. Bashkë me Doshin dhe Frrokun, arrin në pesë numri i deputetëve formalisht nën akuzë për vepra penale. Në shtator 2014, Prokuroria e Përgjithshme ngriti akuza për deputetët socialistë Arben Ndoka dhe Pjerin Ndreu për Goditje për Shkak të Detyrës në lidhje me dhunën e ushtruar nga këto dy deputetë ndaj deputetit të Partisë Demokratike Gent Strazimiri. Deputeti i Partisë Demokratike Astrit Veliaj u vu nën akuzë për ndërtim pa leje.
