Kryeministri i Kosovës Isa Mustafa tha të enjten se ai dhe kryeministri serb kishin rënë të diskutonin disa probleme të caktuara drejtpërdrejt, jo vetëm në takimet në Bruksel.
Kryeministri i Kosovës Isa Mustafa tha në një konferencë për shtyp me përfaqësuesen e lartë të BE-së, Frederica Mogherini të enjten se ai dhe kryeministri serb Aleksandër Vuçiç kishin rënë dakord të diskutonin sfidat që kanë përballë dy vendet.
“Fola me kryeministrin serb Vuçiç rreth bashkëpunimit midis Kosovës dhe Serbisë. Ne vendosëm që situata specifike apo zhvillime të papritura të zgjidhen përmes kontaktit direkt,” tha Mustafa.
Ai kishte vendosur se duhej të kontaktonte me Vuçiçin për valën e emigrantëve ilegalë që u drejtuan nga Kosova në Europën Perëndimore në fillim të këtij viti, kur shtetasit e Kosovës po kalonin Serbinë në përpjekje për të hyrë në BE ilegalisht përmes Hungarisë.
“Fillova një bisedë me zotin Vuçiç gjatë periudhës së migrimit, sepse e pashë të nevojshme t’i kërkoj atij të marrë masa për të mbyllur korridorin e migracionit,” vazhdoi Mustafa.
Në lidhje me bisedën e mbrëmjes së të mërkurës, Mustafa tha se ishte iniciuar nga kryeministri serb. “Këtë herë ishte zoti Vuçiç ai që filloi bisedën dhe ne folëm në telefon mbrëmë,” kujtoi ai.
“Ramë dakord që kur të hasnim me çështje që kishin nevojë për veprime të shpejta në terren, të komunikonim direkt – që të gjenim zgjidhje të shpejta dhe të mos kishin pse të prisnim për takimet në Bruksel,” përfundoi Mustafa.
Përfaqësuesja e Lartë e BE për Çështjet e Huaja dhe Politikën e Sigurisë, në vizitën e saj të parë në Kosovë që prej marrjes së pozicionit në nëntor, përshëndeti formën e re të komunikimit të vendosur mes Prishtinës dhe Beogradit.
Mogherini e përshëndeti këtë hap të madh përpara në procesin e normalizimit.
“Vetëm fakti se ka kontakt, pa ndihmën e Brukselit, është një rezultat i madh,” tha ajo, veçanërisht nëse krahasohej me situatën disa vite më parë.
“Objektivi im personal do të ishte që ndihma e Brukselit të mos jetë e nevojshme më,” shtoi ajo.
