Veteranët e Ushtrisë Çlirimtare të Kosovës hynë me dhunë në oborrin e ndërtesës së qeverisë gjatë një proteste, duke i bërë thirrje autoriteteve të fillojnë t’u paguajnë atyre pensionet shtetërore.
Qindra ish-luftëtarë të Ushtrisë Çlirimtare të Kosovës marshuan drejt ndërtesës së qeverisë ditën e hënë në një protestë në lidhje me vonesat e pagesave të pensioneve shtetërore për veteranët.
Protestuesit rrëzuan portën e ndërtesës dhe hynë në oborr, por ndaluan pasi panë një kordon special policie, i cili ishte vendosur atje për të shmangur përplasjet.
Këshilli për Mbrojtjen e të Drejtave të luftëtarëve të UÇK-së, i cili organizoi protestën, më pas u takua me zyrtarë të qeverisë dhe u dha atyre një ultimatum për të publikuar deri në fund të javës së ardhshme listat e plota të veteranëve që luftuan kundër forcave serbe gjatë konfliktit të viteve 1998-1999.
Publikimi i listave të verifikuara është parakusht për fillimin e pagesave të pensioneve për veteranët.
Udhëheqësi i Këshillit, Xhevdet Qeriqi, i kërkoi protestueve të ktheheshin në shtëpi, por paralajmëroi se do të kishte protesta të tjera nëse ultimatumi i tyre nuk plotësohej.
“Po ju kërkoj të shpërndaheni, sepse nëse listat nuk publikohen deri javën që vjen, do të sakrifikojmë të gjithë veten,” u tha atyre Qeriqi.
Një nga protestuesit, Murtez Thaçi nga Malisheva tha se ai ishte bashkuar protestës, sepse listat e pjesshme të luftëtarëve të UÇK-së që janë bërë tashme publike nga atuoritetet janë rtë pasakta.
“Protestoj kundër listave që janë publikuar tashmë, sepse ato përmbajnë emrat e njerëzve që s’kanë luftuar kurrë me UÇK-në,” tha Thaçi.
Komisioni qeveritar i ngarkuar për verifikimin e atyre që luftuan për UÇK-në mori më shumë se 68,000 aplikime, por ka thënë se rreth 23,000 veteranë do të konfirmohen si përfitues të pensioneve. Disa politikanë të opozitës janë shprehur gjithashtu se ndoshta qeveria po e tepron me shifrar për të forcuar mbështetjen e saj.
Parlamenti i Kosovës caktoi 24 milion euro për veteranët në buxhetin e tij të vitit 2015 dhe premtoi pensione për ata duke filluar që nga janari.
Veteranët e papunë do të marrin në pagesë mujore jo më pak se paga minimale – 170 euro për personat mbi 35 vjeç dhe 130 euro për ata që janë nën 35 vjeç.
Por komisioni i verifikimit ka që në dhjetor që e shtyn publikimin e listave përfundimtare.
