Qindra banorë në fshatin e Marinzës pranë Fierit u urdhëruan të braktisin shtëpitë e tyre pas shpërthimit të gazit në një pus të Bankers Petroleum.
Autoritetet shqiptare urdhëruan evakuimin e fshatit pas “çlirimit të pakontrolluar të gazit” të ndodhura gjatë punimeve për shpimin e një pusi të ri. Pusi është nën pronësinë e Bankers Petroleum, kompanisë me bazë në Kanada e cila nxjerr shumicën dërrmuese të naftës në Shqipëri.
Përveç dy vatrave kryesore të gazit të cilat krijuan shatërvane dhjetëra metra të larta, banorët e fshatit panë ujërat nëntokësore të përzjera me baltë e gaz që shpëthyen mbi oborret e tyre duke nxjerrë efektivisht jashtë përdorimit puset e ujit.
Për fat të mirë nuk pati viktima në njerëz.
Kompania Bankers Petroleum tha në një deklaratë se po heton shkaqet e shpërthimit dhe po punon për të kontrolluar rrjedhjet para se të fillojë punën e pastrimit dhe rikuperimit të territorit.
Ministria e Energjisë dhe Industrisë deklaroi se aktualisht nuk ka rreziqe për jetën e banorëve për shkak të llojit të gazit të çliruar.
Bankers Petroleum përdor teknika të njohura si “dytësore” të nxjerrjen e naftës nga burimet ekzistuese, të cilat e kanë kaluar dekada më parë pikun e prodhimit. Kompania është aktualisht më e madhja në Shqipëri duke realizuar të ardhura prej 583 milionë dollarësh gjatë vitit të kaluar.
Kompania ka patur disa aksidente me shpërthim gazi gjatë viteve të fundit dhe është akuzuar se metodat e saj të nxjerrjes së naftës kanë shkaktuar tërmete në zonat përreth dhe kanë ndotur mjedisin. Kompania ka mohuar akuzat dhe thotë se ka shpenzuar rreth 70 milionë dollarë për projektet e rehabilitimit mjedisor dhe se ka marrë përgjegjësi për pastrimin edhe të disa zonave që qenë ndotur nga koha kur fusha e Patos-Marinzës shfrytëzohej nga kompania publike Albpetrol.
Fusha naftëmbajtëse e Patos-Marinzës është aktualisht fusha kryesore prodhuese e naftës në vend. Shqipëria arriti të prodhojë rreth 1.1 milionë tonë naftë gjatë vitit të kaluar ose rreth 20 mijë fuçi në ditë.
