Partia qeverisëse në Maqedoni e ka bërë zakon punësimin e militantëve të saj në institucionet shtetërore, sugjeroi opozita në disa përgjime të reja që i zbuloi të martën.
Në konferencën e 19 për shtyp mbi çështjen e përgjimeve nga shteti maqedonas, partia e Social Demokratëve në opozitë prezantoi të martën biseda që sipas saj provonte se partia në qeveri VMRO DPMNE e kryeministrit Nikola Gruevski ka punësuar sistematikisht dhe pasivisht njerëzit e saj në të gjitha institucionet shtetërore dhe ka larguar ata që kanë mendua ndryshe.
“Nuk ka shtet. Është kthyer e gjitha në një parti politike,” tha lideri i SDSM Zoran Zaev në konferencën për shtyp.
“Ata kanë mbushur policinë, prokurorinë, gjyqësorin, shërbimin shëndetësor, ndërsa njerëzit që mendojnë ndryshe janë hedhur në rrugë,” tha ai.
Përgjimet, tha Zaev, janë provë se ata kanë uzurpuar çdo gjë, që nga gjykatat te ndërmarrjet publike, spitalet, institucionet nën kontrollin e parlamentit, qeverisë dhe gjyqësorit.
Zaev prezantoi përgjime që duket se sugjerojnë se ministrja e brendshme Gordana Jankulskoa është personi qendror përgjegjës për punësimin e drejtuar nga partia, ndërsa Gruevski dhe kushëriri i tij, shefi i policisë sekrete Saso Mijalkov janë të përfshirë drejtpërdrejt në dhënien e udhëzimeve. “Të gjitha punësimet kalojnë nga komiteti qendror i partisë,” tha opozita.
Në një bisedë Jankuloska i shpjegon shefit të kabinetit të Gruevskit, Martin Protugjer, si nuk duhej të kryhej largimi i një lideri sindikate pasi ai do të kishte bashkëpunuar me ta.
Në një tjetër përgjim, Jankuloska dhe ish-ministri i arsimit Pance Kralev, shfaqen teksa diskutojnë se cilët profesorë do të ngrihen në detyrë.
“Duhet të kontrollojmë se cilët janë këta njerëz. Ata nuk duhet të jenë simpatizantë të opozitës,” thotë Jankuloska të cilës Kralev i përgjigjet se ata nga SDSM nuk do të kalojnë.
Një bisedë tjetër zbulon atë që duket se është një komplot midis Jankuloskës dhe shefit të policisë sekrete Mijalkov për të hequr qafe të gjithë punonjësit e policisë që kanë paditur punonjësin e tyre.
Një bisedë zbulon një kërkesë absurde të shefit të kabinetit të Gruevskit që i kërkon ministres së brendshme t’i gjejë një vend pune shoferit të tij por që nuk do t’i duhej të paraqitej në punë pasi ai duhet të vazhdonte të merrej me çështjet e partisë.
Në disa përgjime të tjera dëgjohet ai që dyshohet të jetë zëri i Gruevskit që kërkon informacion dhe jep udhëzime rreth punësimit të njerëzve të ndryshëm.
“Do të na duhen pesë inxhinierë civilë,” i thotë Gruevski Jankuloskës, të cilit ajo i përgjigjet se do të kenë telashe në gjetjen e të tillëve njerëz mes anëtarëve të partisë.
Zëri i kryeministrit dëgjohet gjithashtu teksa jep udhëzime për punësim në sektorë si në zyrën e të ardhurave publike për 30 ekonomistë, në spitalet shtetërore si dhe në policinë sekrete.
Në një tjetër bisedë shfaqet zëri i kushëririt të kryeministrit maqedonas, që ndërhyn në punësimin e prokurorëve dhe gjykatësve. Në përgjimin e fundit shfaqet kryetari i parlamentit që thotë se anëtari i këshillit gjyqësor Branko Uskovski “nuk ka të bëjë me gjyqësorin fare’ dhe se ai është zgjedhur vetëm nën udhëzimet e një kushëriri të Gruevskit.
Jankuloska i përgjigjet se “nuk e vumë atje ngaqë është i bukur”.
Dy javë më parë Uskovski u bë kreu i ri i Këshillit Gjyqësor, organit që cakton gjyqtarët.
Gruevski ka këmbëngulur se lideri i opozitës Zaev po bashkëpunon me agjenci të huaja për të destabilizuar vendin, ndërsa Zoran Zaev pretendon se kryeministri përgjoi 20 mijë njerëz.
