Dy partitë kryesore politike shpallën zyrtarisht kandidatët për bashkinë më të madhe në vend për zgjedhjet e 21 qershorit 2015.
Mjeku Halim Kosova do të përballet me ministrin aktual të Mirëqënies Erion Veliaj për postin e kryetarit të bashkisë së Tiranës më 21 qershor 2015. Dy partitë kryesore shpallën sot kandidaturat zyrtare për kryeqytetin. Në garën për Tiranën pritet të marrin pjesë edhe kandidatë të pavarur.
Erion Veliaj, ish aktivist i shoqërisë civile, ka kryer studimet e larta për Shkenca Politike në SHBA dhe ka një master në Britaninë e Madhe. Ai themeloi Lëvizjen Mjaft në vitin 2003, të cilën e drejtoi deri në vitin 2007, kur hyri në politikën shqiptare duke themeluar një parti të vogël të quajtur G-99. Pas dështimit të kësaj partie në zgjedhjet e vitit 2009, kur mori një numër të vogël votash, Veliaj kaloi te Partia Socialiste për të cilën garoi në vitin 2013 në krye të listës së kandidatëve të kësaj partie në qarkun e Gjirokastrës.
Veliaj u bë Ministër i Mirëqënies Sociale dhe Rinisë në shtator 2013, post që do ta lërë tani për të garuar si kryebashkiak i Tiranës. Veliaj është aktualisht 36 vjeç.
Halim Kosova, 61 vjeç, ka një karrierë të gjatë si mjek i diplomuar në Universitetin e Tiranës dhe me specializim në Itali. Ai ka marrë titullin Doktor i Shkencave Mjekësore nga Universiteti i Tiranës në vitin 1990.
Kosova u bë ministër për një periudhë të shkurtër në vitin 2013 për Partinë Demokratike dhe hyri në parlament nga lista shumëemërore e kësaj partie në zgjedhjet e vitit 2013.
Duke prezantuar kandidatin Kosova, kryetari i Partisë Demokratike Lulzim Basha deklaroi se ai i është bindur kërkesës së qytetarëve për të garuar me një profesionist dhe jo një politikan.
Kryetari socialist Edi Rama qe më lakonik kur deklaroi thjeshtë se kandidati i partisë së tij për Tiranën qe Erion Veliaj.
Bashkia e Tiranës e krijuar nga reforma administrative dhe territoriale përfshin përveç qyteteve të Tiranës dhe të Krrabës edhe 115 fshatra në një territor të përzjerë urban – rural dhe malor e fushor.
Sipas Censusit të vitit 2011 numëron një popullsi prej 557.422 banorësh. Ndërkohë që sipas Regjistrit Civil kjo bashki numëron 757.361 banorë në një sipërfaqe prej 1110.03 km2 me një densitet prej 682.28 banorë/km2.
Njësitë administrative përbërëse janë: Tiranë, Petrelë, Farkë, Dajt, Zall-Bastar, Bërzhitë, Krrabë, Baldushk, Shëngjergj, Vaqarr, Kashar, Pezë, Ndroq, Zall-Herr.
