Një zyrtar i departamentit amerikan të shtetit tha se qeveria maqedonase duhet të adresojë akuzat e ngritura nga përgjimet sekrete të bisedave të zyrtarëve të lartë prej opozitës.
Zv. Asistent sekretari amerikan i shtetit, Hoyt Yee tha gjatë një vizite në shkup të premten se qeveria duhet t’i marrë akuzat të paktën po aq seriozisht sa merr akuzat kriminale kundër njeriut që publikoi bisedat e përgjuara, liderin e opozitës Zoran Zaev.
“Këto çështje kërkojnë përgjigje dhe llogaridhënie,” tha Yee për median pas takimit me kryeministrin maqedonas Nikola Gruevski.
“E kemi nxitur qeveritë dhe institucionet e saj ta marrin shumë seriozisht sjelljen e paligjshme që pretendohet dhe akuzat e tjera. Të paktën po aq seriozisht sa po merren akuzat kundër Zaev, liderit të opozitës,” shtoi diplomati amerikan.
Në shkurt opozita filloi të bënte publike përgjimet telefonike të bisedave të 20.000 shtetasve maqedonas.
Pasi u akuzua për shantazh të liderëve të vendit dhe u akuzua se ka kërkuar ryshfete, Zaev së fundmi u akuzua edhe me nxjerrje të sekretit shtetëror pasi ai publikoi përgjimet që sugjeronin se shefi i policisë sekrete Saso Mijalkov mori një pjesë prej një prokurimi të policisë.
Ndërsa Zaev duhet të shfaqet rregullisht në seanca dëgjimore, nuk ka shenja se akuzat e ngritura prej tij po hetohen.
“Një aspekt i rëndësishëm i kësaj krize për të cilën ne folëm është informacioni që ka dalë në dritë përmes përgjimeve, informacioni rreth korrupsionit të zyrtarëve të lartë, rreth ndikimit të papërshtatshëm prej qeverisë mbi median, gjyqësorin dhe abuzimet me zgjedhjet dhe pushtetin,” tha Yee.
Ai i bëri thirrje qeverisë së Gruevskit t’i përgjigjet krizës duke riafirmuar zotimin e saj në ndjekjen e rrugës Euro-Atlantike, zotimin për vlerat dhe parimet mbi të cilën bazohet rruga e saj, të demonstrojë angazhim për standardet më të larta të sundimit të ligjit, transparencës, drejtësisë, mbrojtjes së fjalës së lirë, pavarësisë gjyqësore.
Gjatë vizitës së tij dy-ditore, Yee do të takojë të gjithë aktorët kryesorë politik të vendit, përfshirë Zaevin.
“Ne shpresojmë se opozita do të jetë në gjendje të kthehet në parlament që të mund të luajë rolin e saj demokratik, një rol që është zgjedhur për ta bërë,” tha Yee përpara takimit me liderin e opozitës.
Partia social demokrate e Zaev lajmëroi bojkot pas zgjedhjeve të përgjithshme dhe presidenciale të vitit të shkuar kur akuzoi Kryeministrin se ka manipuluar rezultatin, gjë që ai e ka mohuar.
Disa vëzhgues thonë se vizita e Yee në Maqedoni është shenjë e përpjekjeve të rritura diplomatike për t’i dhënë fund krizës në vend.
