Prokuroria e Elbasanit argumenton se zgjatja e tretë e hetimeve për pasurinë e gjyqtarit u diktua nga vonesa e letër-porosive, por Gjykata e hodhi poshtë. “Hetimi mund të rihapet, nëse letër-porositë do të sjellin prova”.
Prokuroria e Elbasanit ka pushuar hetimin për gjyqtarin e Apelit të Tiranës, Gjin Gjoni pa mundur të provojë nëse ai i ka kryer apo jo veprat penale të “falsifikimit të dokumenteve” dhe “refuzimit për deklarim, fshehjes ose deklarimit të rremë të pasurisë”.
Vendimi i pushimit të hetimit , të cilin BIRN e disponon është marrë më 20 prill 2015, pasi Gjykata e quajti të paligjshme një shtyrje të tretë të afateve hetimore për këtë çështje.
Gjyqtari Gjin Gjoni, i cili mban njëherazi pozicionin e anëtarit të Këshillit të Lartë të Drejtësisë u kallëzua penalisht thuajse një vit më parë nga Inspektoriati i Lartë i Deklarimit dhe Kontrollit të Pasurive. Sipas ILDKP, Gjoni dhe bashkëshortja e tij nuk justifikonin burimin e pasurisë së tyre, e cila në total kapte vlerën e rreth 2 milionë dollarëve.
Prokuroria e Elbasanit regjistroi procedimin penal ndaj gjyqtarit dhe bashkëshortes së tij, Elona Çaushi më 12 maj 2014. Më pas, organi i akuzës ka marrë dy vendime për zgjatjen e hetimeve; më 31 korrik 2014 dhe 10 nëntor 2014.
Në vendimin e pushimit, Prokuroria argumenton se nuk ka mundur t’i kryejë hetimet në kohë, për shkak të mosmarrjes së përgjigjeve për dy letër-porosi të dërguara në Gjermani dhe në Francë. Por Gjykata e Elbasanit ka vendosur të mos kishte një shtyrje të tretë, duke caktuar si datë përfundimtare të hetimit 12 shkurtin 2015.
Gjykata e Elbasanit ka argumentuar se edhe në mungesë të letër-porosive, Prokuroria kishte arritur të merrte dëshminë e një shtetasi gjerman si dhe një konfirmim nga një bankë e nivelit të dytë për transfertën 300 mijë euro, të mbërritur nga ai në llogarinë e bashkëshortes së Gjonit.
“Gjykata çmon se provat për të cilat kërkohet letërporosia janë realizuar gjatë hetimit dhe zgjatja e mëtejshme e këtij hetimi do të ishte e pajustifikuar dhe pa shkak ligjor,” thuhet në vendimin e gjykatës.
Prokuroria e ka apeluar këtë vendim, por Gjykata e Apelit në Durrës ka lënë në fuqi vendimin e shkallës së parë.
Në këto kushte, Prokuroria e Elbasanit ka vendosur pushimin e hetimit për gjyqtarin Gjin Gjoni, duke përdorur si “udhërrëfyes” vendimin nr.5, datë 12/12/2008 të Kolegjit Penal të Gjykatës së Lartë. Vendimi nr.5, i cituar në rastin e gjyqtarit Gjoni përcaktoi pushimin e hetimeve për ish-ministrin Lulzim Basha nga Gjykata e Lartë në vitin 2008.
I kontaktuar nga BIRN, gjyqtari Gjoni nuk pranoi të komentonte argumentet e përdorura nga Prokuroria për pushimin e hetimeve. Ai paralajmëroi një reagim të mëvonshëm, “pasi të kishte lexuar vendimin e pushimit”.
Megjithëse ka vulosur çështjen, Prokuroria e Elbasanit ka lënë një shteg hapur për hetim të mëtejshëm të gjyqtarit Gjin Gjoni.
“Çështja mund të rihapet, nëse në përgjigjen e letër-porosive përfitohen të dhëna që mund të shërbejnë për hetimin,” thuhet në vendim.
Gjin Gjoni është gjyqtari i dhjetë, i kallëzuar nga ILDKP në Prokurori për fshehje pasurie përgjatë 10 viteve të funksionimit të këtij institucioni. Nga dhjetë kallëzimet e marra, Prokuroria ka mundur të çojë përballë gjykatës vetëm gjyqtarin e Kavajës, Osman Aliu.
