Policia dorëzon kallëzim në prokurori për tri akuza ndaj kompanisë së prodhimit të çelikut, e cila i ka derdhur mbetjet drejtpërsëdrejti në lumin Shkumbin.
Komisariati i Policisë së Elbasanit deklaroi së fundmi se ka vërejtur shkelje të shumta nga ana e kompanisë së prodhimit të çelikut Kurum në Elbasan dhe për këtë arsye ka dorëzuar në prokurori tri kallëzime ndaj kësaj kompanie.
“Shërbimet Komisariatit të Policisë Elbasan nga inspektimi i kryer pranë Kompanisë “Kurum Internacional” Elbasan kanë kostatuar shkelje të ndryshme që parashikohen nga veprat penale “Ndotja e ajrit”,”Transportimi i mbeturinave toksike” dhe “Ndotja e ujrave” parashikuar nga nenet 201,202 dhe 203 i Kodit Penal,” thuhet në njoftimin e policisë.
Neni 201 i kodit penal e dënon ndotjen e ajrit përmes çlirimit të tymrave, gazrave dhe lëndëve të tjera toksike radioaktive e bërë tej kufirit të normave të lejuara, kur vepra nuk përbën kundërvajtje administrative, përbën kundërvajtje penale dhe dënohet me gjobë ose me burgim gjer në dy vjet.
Por kur ndotja shkakton dëme shëndetësore dënohet me deri dhjetë vjet burg.
Neni 202 dënon transportimin e lëndëve toksike me burgim nga një deri në pesë vjet burg dhe nëse ka sjellë dëme për jetën dhe shëndetin, dënohet me deri dhjetë vjet burg. Me të njëjtën masë dënohen edhe shkelësit e nenit 203.
BIRN kreu një investigim dhjetorin e kaluar ku zbuloi se një mal me skorrje të mbetura pas shkrirjes së skrapit të importuar hidheshin buzë lumit Shkumbin në kundërshtim me ligjin dhe me lejen e importimit të mbetjeve.
Në fillim të prillit, inspektoriati i Mjedisit në Elbasan urdhëroi ndërprerjen e punës në fabrikën e çelikut për shkak se kjo kompani nuk kishte hequr skorjet, siç përcaktohet në ligj, por i ka depozituar ato buzë Shkumbinit duke krijuar një mal së paku 20 metra të lartë dhe disa qindra metra të gjerë.
Kurum është një kompani që punëson zyrtarisht 700 vetë dhe realizon të ardhura prej rreth 200 milionë eurosh në vit. Por këto vende pune dhe të ardhura vijnë me një kosto mjedisore, e cila mund të ketë edhe pasoja të rënda në shëndet.
