Ish-prokurorja Maria Bemieh tha se raporti i Brukselit mbi trajtimin e akuzave të saj për korrupsion brenda misionit të sundimit të ligjit të BE-së në Kosovë nuk vërtetoi se kishte fshehje faktesh.
Dy javë pasi një raport u botua duke arritur në përfundimin se misioni sundimi të ligjit të BE-së në Kosovë (EULEX) ka reaguar në mënyrë të përshtatshme për pretendimet për korrupsion brenda radhëve të tij, prokurorja e cila zbuloi pretendimet e përshkroi dokumentin si një zhgënjim.
Në letër të dërguar BIRN Kosovës, ish-prokurorja e EULEX-it Bamieh, pretendimet e të cilës shkaktuan një skandal në misionin e BE-së vitin e kaluar,tha se raporti për hetimin e akuzave të saj nga avokati i BE-së Jean-Paul Jacque nuk ka trajtuar problemet që ngriti ajo.
“Ky raport është zhgënjyer dhe në disa raste i pasaktë. Informacione të rëndësishme janë lënë jashtë raportit dhe ai ngjan më shumë si një raport i brendshëm sesa një raport i pavarur,” tha Bamieh në letër, të cilën ajo ka në plan t’ia dërgojë gjithashtu edhe Parlamentit Evropian.
“Jacque nuk merret me korrupsionin në Kosovë dhe përqendrohet tek unë. Raporti i tij përpiqet të ndihkojë hetimin që vazhdon ende,” tha Bamieh, duke iu referuar një hetimi nga Task Forca Ndërkombëtare – një hetim të jashtëm që merret me vetë akuzat për korrupsion.
Skandali i korrupsionit shpërtheu tetorin e kaluar, pasi Bamieh shprehu shqetësime se stafi ligjor i EULEX-it mund të kishte pranuar ryshfete nga të dyshuar ose nuk po ndiqte procedurat gjyqësore. Raporti i Jacque pranoi se skandali ka dëmtuar reputacionin e EULEX-it.
Bamieh tha se Jacque nuk duhet të bëjë vlerësime mbi vlefshmërinë e provave . Kjo gjë i duhet lënë task forcës, këmbënguli ajo.
“Raporti i tij synon të ndikojë në hetimin që vazhdon nga ana e Task Forcës së pavarur, duke qenë se ai vazhdimisht jep mendimin e tij mbi dëshmitarët dhe provat,” tha ajo.
Ish-prokurorja e EULEX-it “nuk e pranon se ka pasur fshehje” të akuzave të saj.
Ajo tha se në mesin e vitit 2012, kur ajo i raportoi dyshimet eprorëve të saj, “ata nuk menduan se duhet të kishte ndonjë hetim bazuar në formimet e tyre inteligjente”.
Por pastaj në mars të vitit 2013, pasi mori atë që Bamieh pretendoi se ishte “inteligjencë gjermane”, misioni zbuloi baza për të hetuar. Në raportin e tij, Jacque nuk shpjegon “ndryshimin themelor në qasje”, tha ajo.
“Profesori Jacque nuk bën asnjë llogari se pse, kur një anëtar i stafit raportoi korrupsion ata nuk bënë asgjë, por kur informacioni doli nga një burim i jashtëm, ata vendosën të bënin kërkime në lidhje me këtë gjë,” shtoin ajo.
Arsyeja e dhënë nga Jacque në raportin për vonesën në nisjen e hetimit është për se për shkak të ndryshimeve në staf dhe gabimeve administrative, Bruksesi nuk ishte vënë shumë në dijeni të dokumentit ku paraqiteshin me detaje dyshimet e Bamieh dhe nuk pati asnjë veprim nga ana e stafit të lartë të EULEX-it për të hetuar pretendimet e saj.
“Përfundimi se nuk kishte pati fshehje provash është një konkluzion shumë i diskutueshëm. Një person edhe mund të ndodhë të mos regjistrojë një dokument, por ne kemi tri persona, të cilët, me sa duket, kanë bërë në mënyrë të pavarur të njëjtin gabim administrativ,” tha Bamieh.
Sipas shtrirjes kohore në raportin e Jacque, në qershor të vitit 2012, Maria Bamieh i ka dorëzuar një raport shefave të misionit të EULEX-it, i cili përmbante “elementë që jepnin shkaqe për shqetësime të mëdha”.
Ankesa e Bamieh përmbante edhe përgjime bisedash telefonike midis ish-zyrtarit të Ministrisë së Shëndetësisë Ilir Tolaj, i cili ishte në gjyq se dyshohej për marrje ryshfeti dhe evazion fiskal dhe në atë kohë ishte në burg, dhe disa ndërmjetësish të tij të ndryshëm, të cilët pretendonin se kishin folur me gjykatësin Florit dhe i premtonin Tolajt se vendimi i gjyqit do të ishte në favor të tij.
Emailet që përmbanin raportin e saj përfunduan në tavolinën e shkrimit të kreut të Misionit të BE-së në atë kohë, dhe u planifikua një takim për në gusht të vitit 2012, ku duhej të diskutohej për këtë problem. Takimi nuk u zhvillua kurrë dhe së shpejti u caktua një shef i ri i misionit dhe çështja me sa duket u harrua.
Zv/kreu i misionit informoi gojarisht Shërbimin Evropian për Veprim të Jashtëm mbi zbulimet e Bamieh, por në raportet mujore të EULEX-it në Bruksel nuk u gjet asnjë gjurmë e kësaj çështjeje. Pika e kontaktit në Bruksel gjithashtu duket se nuk mban mend të ketë marrë një informacion të tillë ose ta ketë kaluar atë.
“Misioni nuk filloi ndonjë hetim në këtë datë. Duket se përmbajtja e përgjimeve nuk u duk e besueshme,” thotë raporti i Jacque.
Por Bamieh tha gjithsesi nuk kishte “absolutisht asnjë justifikim për këtë përfundim”.
Ajo tha se askush nuk bëri asnjë shënim me shkrim për vendimin e tyre ose bazat mbi të cilat ata arritën në këtë përfundim.
Mungesa e ndonjë të dhëne apo dokumentesh, madje edhe humbja e provës origjinale të dorëzuar nga Bamieh “tregon se ka fshehje provash ose të paktën duhet të ketë hetime të mëtejshme nga ana e Jacque”, këmbënguli ajo.
Bamieh u pezullua pasi akuzat e saj u bënë publike në mediat në Kosovë
Gabriele Meucci, kreu aktual i Misionit të EULEX-it, tha në një intervistë në programin “Jeta në Kosovë” ditën e enjte në mbrëmje se ai mendon se misioni i BE-së veproi si duhej duke e larguar atë nga puna.
“Ajo u pezullua në mënyrë të ligjshme dhe me baza, njësoj siç citohet në raportin e Jacque,” tha Meucci.
“Në kohën e pezullimit të saj, dokumentet që kishin rënë në dorë të shtypit kishin dalë nga zyra e saj dhe i përkisnin një hetimi që vazhdonte, diçka që s’duhej të ishte ndarë me publikun,” tha ai.
