Studentët e mbështetur nga pedagogët vazhdojnë protestat kundër reformës së diskutueshme të Arsimit të Lartë, që sipas tyre rrit tarifat dhe cenon autonominë universitare.
Qindra studentë marshuan nga korpusi i Universitetit të Tiranës drejt kryeministrisë, për t’i thënë Ndal reformës së qeverisë “Rama” për Arsimin e Lartë. Në protestën e tyre të katërt, studentët dhe pedagogët bllokuan bulevardin përpara kryeministrisë, ku shprehën zemërimin e mospërfshirjes në reformë dhe shqetësimin se ajo është bërë për t’i shërbyer interesave privatë dhe jo arsimit publik.
Studentët protestuan me bilbilë, daulle dhe pankartën simbol “Reforma nuk kalon”. Ata hodhën gjithashtu letra higjienike në drejtim të Kryeministrisë, i ngjyen karikaturat e kryeministrit dhe ministres së Arsimit me tortë dhe dogjën me benzinë një pankartë që simbolizonte reformën aktuale.
“Kryeministri dhe zyrtarët e tjerë arsimorë vazhdojnë të heshtin përballë dallgës në rritje të studentëve dhe pedagogëve,” thanë përfaqësuesit e lëvizjes “Për Universitetin”. “Kjo heshtje është vërtetuesja e kapjes klienteliste e reformës dhe reformuesve,” shtuan ata.
Bashkë me studentët shqiptarë, në protestë u solidarizuan edhe studentë nga Kosova dhe Maqedonia, të cilët i kërkuan qeverisë shqiptare të anulojë projektligjin.
“Kjo është një katastrofë universitare që po bëhet nga qeveria e sotme dhe që është bërë edhe nga qeveria e djeshme. Duke e bërë universitetin të papërballueshëm për shumicën e popullsisë, reformuesit do ta bëjnë arsimin e lartë privilegj të klasave elitare,” tha Arlind Qori, pedagog në Universitetin e Tiranës.
Ligji për Arsimin e Lartë u miratua nga qeveria më 1 prill 2015, pas një procesi të gjatë pune nga një Komision i ngritur për të realizuar reformën. Por studentët dhe një numër i madh pedagogësh e kundërshtuan atë, me pretendimin se sugjerimet e tyre nuk u morën parasysh.
Që prej miratimit të reformës në qeveri, studentët e disa universiteteve në Tiranë kanë organizuar një sërë protestash, me shpresën se qeveria do të tërhiqej nga një vendim që ata e quajnë të padrejtë.
Studentët e quajnë reformën shkatërrimtare, pasi rrit tarifat dhe cenon autonominë universitare. Protestuesit paralajmëruan të mërkurën se protesta të tjera do të organizohen në vijim, nëse qeveria nuk merr parasysh kërkesat e tyre. Ata e akuzuan qeverinë se po synon ta kalojë reformën në qershor në Parlament, kohë kur studentë mbyllin vitin akademik dhe shpërndahen në qytetet e tyre.