Inspektoriati i Lartë i Deklarimit të Pasurive e ka kallëzuar deputetin Doshi edhe për transferta të dyshimta brenda dhe jashtë vendit, të cilat kapin vlerën e 9 milionë eurove.
Inspektoriati i Lartë i Deklarimit dhe Kontrollit të Pasurive ka kallëzuar penalisht deputetin Tom Doshi për fshehjen e 14 milionë eurove pasuri. Doshi akuzohet gjithashtu për transferta të dyshimta bankare brenda dhe jashtë vendit, të cilat kapin vlerën e 9 milionë eurove.
Në një deklaratë për mediat, ILDKPI tha se kishte kryer kontrollin e plotë të pasurisë së Tom Doshit për periudhën 2005-2014, para se të bënte kallëzim penal në Prokurori.
“Rezultuan fshehje pasurie dhe deklarime të rreme në shumën 14 milionë euro dhe kontrata fiktive pasurish, transferta bankare të dyshimta e pa burime të ligjshme financiare dhe dyshime për pastrim parash në shumën e 9 milionë eurove,” thuhet në njoftimin e ILDKP.
Kallëzimi i ILDKP vjen në një periudhë të trazuar për deputetin e dëbuar të Partisë Socialiste, Tom Doshi. Aktualisht ai gjendet në hetim nga Prokuroria e Përgjithshme për veprën penale të “kallëzimit të rremë”.
Më 2 mars 2015, deputeti i Shkodrës, Tom Doshi u përjashtua nga Partia Socialiste, pasi kishte denoncuar një skenar për vrasjen e tij. Pas përjashtimit, Doshi akuzoi kryetarin e Kuvendit, Ilir Meta se fshihej pas kësaj ngjarjeje.
Prokuroria e Përgjithshme nisi hetimet, por arriti në përfundimin se ngjarja ishte sajuar nga deputetët Tom Doshi dhe Mark Frroku. Doshi u arrestua, pasi Prokuroria mori një autizim nga Parlamenti i Shqipërisë, por më 28 prill 2015, Gjykata e Lartë i hoqi masën e arrestit shtëpiak. Aktualisht, Doshi po hetohet në gjendje të lirë.
Kallëzimi i ILDKPI për fshehje dhe transferta të paligjshme në vlerën e 23 milionë eurove pritet të verifikohet nga Prokuroria, paralelisht me çështjen tjetër të hapur kundër Doshit. Ndërkohë, Inspektoriati i Lartë i Deklarimit të Pasurive tha se ky kallëzim është i vonuar.
“Subjekti Tom Doshi është kontrolluar nga 2005 deri në 2013 disa herë, por megjithëse inspektorët kanë vërejtur shkelje të ligjit dhe konflikt interesi, drejtuesit e ILDKPKI i kanë mbajtur ato të fshehura, duke mos i dërguar në Prokurori,” pretendon ky institucion.
Deputeti Tom Doshi nuk është politikani i vetëm, i kallëzuar në Prokurori për fshehje pasurie apo deklarime të rreme. Gjatë dy muajve të fundit, ILDKPKI ka kallëzuar ish-deputetin Andis Harasani, ish-ministrin e Financave, Ridvan Bode dhe një numër të konsiderueshëm drejtuesish të pushtetit vendor.
