Qeveritë e Kosovës dhe Maqedonisë duket se po bashkëpunojnë në identifikimin e të vrarëve dhe të arrestuarve në Kumanovë, Maqedoni.
Maqedonia dhe Kosova kanë krijuar shkëmbim informacioni në verifikimin e viktimave dhe të atyre që u arrestuan në Kumanovë fundjavën e shkuar gjatë aksionit të qeverisë maqedonase.
Sipas ministrisë së brendshme maqedonase disa prej atyre që u përfshinë në luftime ishin shtetas të Kosovës.
Ardian Arifaj, këshilltar i qeverisë së Kosovës, tha se autoritetet kosovare i kishin dhënë homologëve maqedonas shenjat e gishtave të nëntë shtetasve të Kosovës që u raportuan si të vrarë ose të arrestuar në luftime.
“Në fakt, ne nuk e dimë nëse janë shenjat e gishtave të atyre të arrestuar apo të viktimave. Ata kërkuan nëntë dhe ne ia çuam. Kështu, bashkëpunimi dhe shkëmbimi i informacionit ekziston,” tha Arifaj.
Autoritetet kosovare thanë se kanë një listë me 23 shtetas të Kosovës të lidhur me luftimet në Kumanovë.
“Maqedonasit na kanë informuar se ata janë arrestuar dhe janë shtetas të Kosovës. Aktualisht, ne po identifikojmë identitetet e tyre,” vazhdoi Arifi.
Të premten, të burgosurit do të vizitohen nga familjarët e tyre, gjë që autoritetet maqedonase e kanë lejuar.
Zv. Ministri i jashtëm i Kosovës, Petrit Selimi, u takua me ambasadorin e Maqedonisë, Ilija Strasevski, për të diskutuar zhvillimet shqetësuese në Maqedoni dhe mënyrat për të intensifikuar bashkëpunimin dhe shkëmbimin e informacionit mes dy vendeve.
Deri më tani, tre prej të vrarëve janë identifikuar. Dy janë kosovarë, Beg Rizaj dhe Mirsad Ndrecaj. Një i tretë, Nusret Kaloshi, ishte nga Shkupi. Rreth 14 persona të armatosur raportohen të vrarë në luftimet e fundjavës së shkuar.
Ndrecaj luftoi në konfliktin e armatosur në Maqedoni në 2001, si pjesë e formacionit gueril etnik shqiptar, Ushtrisë Çlirimtare të Kosovës. Ai konsiderohet gjerësisht si lideri i grupit të përfshirë në luftimet me policinë të shtunën dhe të dielën.
Beg Rizaj, që ishte i përfshirë direkt me grupin terrorist të dyshuar, ka qenë më herët një luftëtar në UÇK, një formacion gueril shqiptar etnik që luftoi në Kosovë gjatë konfliktit 1999 në vend.
Të shtënat dy-ditore në Kumanovë rezultuan në tetë policë të vrarë dhe 37 të plagosur. Shumë shtëpi në zonë u dëmtuan rëndë.
