Pas raportimeve se askush nuk kishte aplikuar për postet e reja në veri të Kosovës rezervuar për minoritetin serb, u vu re një dyndje kandidatësh.
Pas lajmit se askush nuk kishte aplikuar për vendet vakante në sistemin gjyqësor në veri të Kosovës, rreth 80 kandidatë kanë aplikuar tani për pozicione, përfshirë disa që kanë qenë të punësuar më parë në sistemin gjyqësor të ashtuquajtur ‘paralel’ të financuar dhe operuar nga pala serbe.
58 kandidatë kanë aplikuar për të qenë gjyqtarë ndërsa 12 kanë aplikuar për pozicionin e prokurorit, tha Enver Peçi, kreu i Këshillit Gjyqësor të Kosovës.
“Ne madje kemi kandidatë që punonin për sistemin gjyqësor paralel serb në Kosovë,” shtoi Peçi.
Mediat e Kosovës raportuan javën e shkuar se askush nuk kishte aplikuar për pozicionin e gjykatësve dhe prokurorëve në veri, afati i fundit i të cilit ishte 25 maji. Punësimi i minoritetit serb vjen si pasojë e një marrëveshje të arritur në janar, që është gjithashtu thelbësore për formimin e Lidhjes së planifikuar të Komunave Serbe.
Lidhja, pjesë e frytit të dialogut Kosovë-Serbi të drejtuar nga BE do t’i ofrojë komunitetit serb në Kosovë fuqi të mëdha ndërsa rrit integrimin e tyre në vend.
Marrëveshja e nënshkruar nga kryeministri i Kosovës dhe Serbisë në janar synon të integrojë serbët e Kosovës në gjyqësorin e vendit, diçka që ka qenë në nivel minimal deri më tani.
Sipas marrëveshjes, të gjitha institucionet gjyqësore në veri do të funksionojnë sipas ligjeve të Kosovës përmes një gjykate të shkallës së parë dhe një zyre prokurorie të së njëjtës shkallë. Kreu i prokurorisë do të jetë nga Kosova.
