Gjykata e Hagës i ka kërkuar autoriteteve të Beogradit të dërgojnë liderin e Partisë Radikale Serbe Vojisllav Sheshel në qendrën e paraburgimit pasi ka shkelur kushtet e lirimit të tij të parakohshëm.
Dy muaj pas vendimit të saj fillestar për revokimin lirimin e përkohshëm të të pandehurit për krime lufte Sheshel për t’u kuruar nga kanceri, dhoma e apelit në Gjykatën Penale Ndërkombëtare për ish-Jugosllavinë i ka kërkuar Ministrisë serbe të Drejtësisë ta kthejë atë përsëri në qendrën e burgimit të OKB-së në Holandë.
Ministria e Drejtësisë tha për BIRN ditën e martë se e ka marrë kërkesën të hënën në mbrëmje dhe tani do t’ia kalojë atë qeverisë, e cila më pas “do të marrë një qëndrim në lidhje me atë”.
Ministria tha gjithashtu se dokumenti është konfidencial dhe se qeveria do të vendosë se sa nga ai dokument do ta bëjë publik në një fazë të mëvonshme.
Shesheli po gjykohet për krime lufte në Bosnje, Kroaci dhe Serbi, por u kthye në Beograd, pasi iu dha lirimi i përkohshëm për arsye humanitare në muajin nëntor.
Lideri i partisë nacionaliste po thirret të rikthehet në paraburgim sepse ka shkelur kushtet e lirimit të tij, pasi ai ka deklaruar disa herë se ai nuk do të kthehet në gjykatë për të dëgjuar vendimin e gjyqit të tij.
Që prej kthimit të tij në Beograd në nëntor, ai ka udhëhequr protestat nacionaliste dhe ka bërë një sërë deklaratash të ashpëra që kanë zemëruar viktimat e luftës.
Ditën e hënë Shesheli ritheksoi se nuk do të kthehet me dëshirë në Hagë.
“Pyesni qeverinë e Serbisë se çfarë do të bëhë. Unë e kam thënë atë që kisha për të thënë. Nuk do të kthehem me dëshirë, por as nuk do t’ia mbath. Do të vazhdoj aktivitetet e mia si të mos kishte ndodhur asgjë,” tha ai.
Nëse Shesheli nuk kthehet vullnetarisht, do të duhet të nxirret një tjetër urdhër arresti. Procedura mund të zgjasë deri në dy javë, pasi sipas ligjit serb, autoritetet duhet të përcaktojnë identitetin e tij dhe vetëm më pas të marrin vendimin për ta esktraduar atë. Shesheli ka gjithashtu të drejtë të apelojë kundër një vendimi të tillë.
Kryeministri serb Aleksandër Vuçiç tha se Serbia do të veprojë sipas ligjit, por se vendi nuk është një shërbim ndërkombëtar dërgesash.
“Serbia nuk është Fedex apo DHL,” thaVuçiç për televizionin B92.
“Nuk duam të rrezikojmë të ardhmen evorpiane të Serbisë, por gjithashtu nuk duam të marrim pjesë në vendime imorale. Ata do të duhet të shpjegojnë sa i sëmurë është ai dhe se si u bë më mirë. Shesheli këtu po bën kimioterapi. Çfarë do të ndodhë nëse ai nuk e bën atë në Hagë? A do të konsiderohet qeveria serbe si vrasëse sepse e dërgoi atë atje?” pyeti ai.
Shesheli ka qenë në paraburgim që prej vitit 2003, kur ai u dorëzua vullnetarisht.
Vendimi për çështjen e tij ishte programuar të merrej në tetor të vitit 2013, por u shty pasi një nga gjykatësit e çështjes u largua nga çështja se dyshohej për njëanshmëri.
Gjykatësi i ri pritet të marrë kohë deri në fund të qershorit të këtij viti për t’u familjarizuar me detjate e çështjet, duke shkaktuar kështu një tjetër vonesë në gjyqin maratonë.
