Ambasadori holandez në Prishtinë tha se Ministri i Jashtëm Hashim Thaçi nuk duhet të kishte kritikuar dënimin e ish-luftëtarëve të “Grupit të Drenicës” të Ushtrisë Çlirimtare të Kosovës për krime gjatë kohës së luftës.
Ambasadori holandez, Robert Bosch tha për gazetën “Kosova Sot” ditën e enjte se pretendimi i Thaçit se vendimi për dënimin e ish-luftëtarëve ishte i motivuar politikisht ishte i papërshtatshëm.
“Zyrtarët nuk duhet të komentojnë kurrë mbi vendimin e gjykatës,” tha Bosch.
Njëmbëdhjetë anëtarë të celulës “Grupi i Drenicës” të UÇK-së, përfshirë kryetarin aktual të komunës së Skenderajt, Sami Lushtaku, dhe ish-ambasadorin e Kosovës në Shqipëri, Sylejman Selimi, u dënuan muajin e kaluar për një sërë krimesh, përfshirë torturim dhe abuzim me të burgosurit.
Por Thaçi, i cili ishte kreu i krahut politik të UÇK-së gjatë konfliktit të viteve 1998-1999, shkroi në Facebook javën e kaluar se vendimi “ishte një përpjekje për prishur imazhin e luftës së drejtë të UÇK-së”.
Ai tha se drejtësia kishte qenë gjithmonë “qëllimi i luftëtarëve të lirisë”, por se “vendimi për ‘Grupin e Drenicës’ e vë në dyshim këtë qëllim, dhe nuk njollos vetëm UÇK-në, por edhe vetë drejtësinë”.
Vendimi shkaktoi një protestë nga qindra veteranë të luftës së Kosovës të cilët bllokuan rrugën kryesore nga Prishtina drejt Pejës për të shprehur zemërimin e tyre.
Por Cezary Michalczuk, një prokuror i BE-së i cili hetoi çështjen, mohoi që vendimi të ketë qenë i motivuar politikisht.
“Ky ishte një proces gjyqësor dhe nuk ka aspak të bëjë me politikën apo me pozicionet e disa njerëzve të caktuar në shoqëri apo jetën politike në Kosovë,” tha Michalczuk.
