Opozita maqedonase pretendon se administrata e kryeministrit Gruevski përgjoi edhe disa nga OJQ më aktive dhe më kritike në vend.
Aktivistë të lartë nga OJQ-të më të mëdha, si Komiteti Maqedonas i Helsinkit për të Drejtat e Njeriut, Transparency – Macedonia, Fondacioni Shoqëria e Hapur – Maqedoni, CIVIL – Qendra për Liri dhe fondacioni Metamorfozë, janë përgjuar për vite, pretendoi lideri i Social Demokratëve Zoran Zaev në një konferencë për shtyp të hënën.
“Është e qartë se këto janë OJQ më aktive që janë vëzhgues kritikë të proceseve sociale dhe që po luftojnë për të përmirësuar të drejta themelore të garantuara nga kushtetuta,” tha Zaev.
Përfaqësuesve të OJQ-ve iu dorëzuan dosje me atë që opozita tha se ishin biseda që qenë përgjuar. Zaev tha se Social Demokratët nuk do t’i bëjnë publike këto përgjime për të mbrojtur privatësinë e viktimave.
Opozita pretendon se kryeministri Nikola Gruevski ka përgjuar 20,000 persona, përfshirë ministrat e tij.
Që nga shkurti opozita ka publikuar përgjime që implikojnë zyrtarë të lartë dhe ka kërkuar dorëheqjen e Gruevskit.
Zaev, që e mbajti konferencën për shtyp në një tendë kampi jashtë ndërtesës qeveritare tha se më shumë OJQ ishin nën vëzhgim dhe se opozita do t’ia dorëzojë edhe atyre materialin për njerëzit e shinjestruar.
“Përgjimet e deritanishme tregojnë se Gruevski dhe shefi i policisë sekrete që ka dhënë dorëheqjen, ka përgjuar jo vetëm ministrat e tij por edhe publikun kritik në Maqedoni,” tha Zaev.
Përpara bisedimeve të reja me qeverinë, që kanë si synim qetësimin e situatës dhe që ndërmjetësohen nga BE-ja në Bruksel, Zaev përsëriti kërkesën e opozitës.
“Populli maqedonas nuk meriton këtë regjim. Ai duhet të bjerë dhe hapi i parë është largimi i Gruevskit,” tha Zaev.
Gruevski nga ana e tij ka këmbëngulur se përgjimet ishin krijuar nga agjenci të huaja inteligjence dhe se kishin synim të destabilizonin vendin.
Përgjimet kanë shkaktuar një seri protestash dhe kanë rritur presionin për dorëheqjen e Gruevskit.
