Foto: BIRN.
Isa Boletini, një lider ushtarak dhe hero kombëtar në Kosovë dhe Shqipëri, do të rivarroset me një ceremoni në qytetin verior të Mitrovicës, pothuajse një shekull pas vdekjes së tij.
Foto: BIRN.
Boletini, një luftëtar nacionalist shqiptar, i cili ndihmoi për të udhëhequr luftërat ushtarake kundër Perandorisë Osmane, forcave serbe dhe malazeze në fund të shekullit të 19-të dhe fillim të shekullit të 20-të, u rivarros në një ceremoni në fshatin Boletin, në qytetin verior të Mitrovicës, ditën e mërkurë.
Qindra njerëz morën pjesë në rivarrimin që pasoi një ceremoni përkujtimore publike në stadiumin e futbollit në Mitrovicë, ku zyrtarë të lartë përfshirë presidentin shqiptar Bujar Nishani mbajtën fjalime.
“Është një nder i veçantë të jem i ftuar në këtë ceremoni historike sepse sot historia do të rishkruhet duke i dhënë fund udhëtimit të Isa Boletinit, që po kthehet në një Kosovë të lirë, ashtu siç e donte kur ishte gjallë,” tha Nishani.
Kryeministri i Kosovës, Isa Mustafa tha se Boletini frymëzoi njerëzit të luftonin për lirinë e shqiptarëve në shekullin e 19.
“Brezi i Isës luftoi për ëndrrën e lirisë së të gjithë shqiptarëve,” tha Mustafa.
Pati gjithashtu një seancë ceremoniale në parlamentin e Kosovës në nderim të Boletinit të martën.
Xhavit Haliti, një anëtar i Partisë Demokratike të Kosovës, tha se “është një privilegj i madh të mund të nderojmë kujtimin e tij”.
“Isa Boletini meriton respektin e të gjithë shqiptarëve dhe varri i tij do të shndërrohet në një vend të shenjtë për të gjithë shqiptarët në Ballkan,” tha ai.
Dhjetëra admirues morën pjesë gjithashtu në seancën e hapur parlamentare.
Neriman Braha nga Prishtina tha se Boletini luftoi për ta pasur Kosovën të bashkuar me Shqipërinë dhe se ëndrra e tij duhet të realizohet.
“Ai e kishte këtë shprehje të famshme: “Unë jam mirë kur Shqipëria është mirë.” Por Shqipëria vazhdon të mbetet ashtu siç ishte që nga koha që ai u vra. Ai do të prehet i qetë vetëm në një shtet të bashkuar, siç ëndërronte ai,” tha Braha për BIRN.
Qazim Ferizaj erdhi nga Tropoja në Shqipëri për t’i bërë nderimet e tij. “Isa Boletini bashkoi të gjithë shqiptarët”, tha ai për BIRN.
Në ditët para seancës parlamentare në Prishtinë, eshtrat e Boletinit u çuan në një tur në qytete të tjera të Kosovës, përfshirë Prizren, Deçan dhe Skënderaj.
Boletini u vra gjatë një luftimi në Mal të Zi në vitin 1916 dhe u varrosë në Podgoricë. Në vitin 1998, eshtrat e tij u zhvarrosën dhe u sollën në Mitrovicë, ku u mbajtën në xhaminë e qytetit.
Ato u zhvendosën në vitin 2011 – kryesisht për arsye sigurie në veriun e trazuar të Kosovës – dhe u dërguan në Departamentin e Mjekësisë Ligjorë në Prishtinë, ku u mbajtën deri në këtë vit.
Vendimi i muajit të kaluar për të rivarrosur Boletinin në Vlorë, i marrë nga Ministri i Jashtëm i Kosovës Hashim Thaçi dhe kryeministri i Shqipërisë, Edi Rama, shkaktoi reagime negative mes shqiptarëve të Kosovës.
Familja Boletini ra dakord fillimisht ta varroste atë në Vlorë, por pastaj e ndryshoi vendimin e saj.
Nderimi i Boletinit u dënua nga deputetët e pakicës serbe në Kosovë, të cilët bojkotuan seancën parlamentare të ditës së martë, duke e quajtur atë një provokim.
Aleksandar Jablanovic i Iniciativës Qytetare Srpska tha se kjo tregoi “mungesë konsiderate për ndjenjat” e serbëve në Kosovë.
