Duke festuar 10-vjetorin e tij, BIRN do të organizojë një konferencë rajonale mbi median për të diskutuar çështje kritike që prekin sektorin dhe do prezantojë rekomandimet nga shoqëria civile e Ballkanit për qeveritë që të përmirësohet situata e medias.
Konferenca rajonale mbi median e Rrjetit Ballkanik të Gazetarisë Investigative, e titulluar “Sfidat e Lirisë në Media” do të mbahet të premten më 12 qershor në Sarajevë, ku drejtorët e BIRN dhe ekspertët e medias do të debatojnë pengesat e lirisë së medias në Ballkan.
“Mediat në rajon janë në skllavëri të plotë ndaj bizneseve dhe politikanëve. Në disa vende situata është alarmante,” tha Gordana Igriç, Drejtore e Rrjetit Rajonal BIRN.
“Besoj se është e rëndësishme të shihet panorama rajonale. Disa nga problemet janë specifike, por disa janë të përbashkëta në të gjithë Ballkanin. Në mënyrë që të përballemi me to, na duhet një iniciativë unike dhe e përbashkët,” tha Igriç.
Johannes Hahn, Komisioneri i BE për Zgjerim, do t’i adresohet pjesëmarrësve përmes një video-mesazhi, ndërsa Florian Bieber, një profesor në Universitetin Graz, do të prezantojë një listë rekomandimesh për qeveritë e Ballkanit që të përmirësohet situata e medias në rajon.
[fact title=”BIRN Feston 10-vjetorin”]Konferenca rajonale e medias “Sfidat e Lirisë së Medas” është pjesë e festimit të 10-vjetorit të BIRN.
BIRN është i pranishëm në rajonin e Ballkanit, me organizata me bazë në Shqipëri, Bosnje dhe Hercegovinë, Kosovë, Maqedoni, Rumani dhe Serbi.
Për qëllime redaksionale ka një rrjet gazetarësh dhe redaktorësh në Malin e Zi, Kroaci, Bullgari, Greqi dhe me raste Moldavi.
Organizata ka një prani të gjerë në media – online, shtyp i shkruar, TV dhe në radio. Uebsajti kryesor i BIRN www.BalkanInsight.com, një nga 15 sajtet në gjuhë të ndryshme që BIRN drejton lexohet në më shumë se 200 shtete kudo në botë.
Problemet kyçe në Ballkan të cilat BIRN i ka identifikuar përfshijnë mungesën e lirisë së shprehjes, humbjen e pavarësisë së medias, mungesën e qeverisjes së mirë, një mungesë të përpjekjeve anti-korrupsion, akses i pakët në drejtësi dhe të drejtat dhe pamundësi e organizatave të shoqërisë civile për zgjidhjen e problemeve me interes publik.[/fact]
Rekomandimet janë një përpjekje e përbashkët nga më shumë se 30 profesionistë dhe ekspertë mediesh që u mblodhën në Sarajevë një ditë përpara në një tryezë të rrumbullakët për lirinë rajonale të shprehjes për të diskutuar të drejtat e punës, financimin shtetëror të medias dhe transmetuesve publikë, tregun mediatik, transparencën e zotërimit të medias dhe përfaqësimin me grupeve të dobëta dhe të margjinalizuara.
Disa nga ekspertët që morën pjesë në hartimin e rekomandimeve ishin Remzi Lani nga Instituti Shqiptar i Medias, Asja Roksa Zubceviç nga Agjencia Rregullatore Boshnjake e Komunikimit Elektronik, Sasa Lekoviç, presidente e Lidhjes Kroate të Gazetarëve, Sami Kurteshi, Avokati i Popullit në Kosovë, Dejan Georgievski nga Qendra Maqedonase për Zhvillimin e Medias, Zeljko Ivanoviç drejtor i gazetës malazeze Vijesti dhe Tatjana Jakobi nga Qendra Serbe për Zhvillim të Sindikatave të Tregtisë.
Ekspertët u mblodhën në Sarajevë si pjesë e një Forumi të Shoqërisë Civile në Ballkanin Perëndimor, një projekt i përbashkët i Fondacionit
ERSTE, Friedrich-Ebert-Stiftung dhe Instituti Karl Renner, në bashkëpunim të ngushtë me Ministrinë Federale Austriake për Europën, Integrimin dhe Çështjet e Jashtme.
Forumi Shoqëria Civile e Ballkanit Perëndimor ofron një mundësi unike për përfaqësuesit e shoqërisë civile për Europën jug-lindore që të shprehin mendimet e tyre dhe të formulojnë kërkesa konkrete për përfaqësuesit e lartë të Bashkimit Europian, shtetet e tij anëtare dhe qeveritë e shteteve në Ballkanin Perëndimor.
Sugjerimet që do të prezantohen në Sarajevë do të bëhen pjesë e një pakete më të gjerë rekomandimesh nga shoqëria civile në Samitin e Ballkanit Perëndimor në Vjenë, që do të mbahet në gusht.
Samiti është një vazhdimësi e të ashtuquajturit “Proces i Berlinit” që u iniciua në gusht 2014 nga kancelarja gjermane Angela Merkel për të treguar zotim të mëtejshëm politik për zgjerimin e ardhshëm të Bashkimit Europian në Ballkanin Perëndimor.
