Astrit Beci, drejtor i Përgjithshëm i FSDKSH jep dorëheqjen pas zbulimit të skemës së mashtrimit me ilaçet e rimbursueshme. Zgjerohet rrethi i të hetuarve nga Prokuroria.
Drejtori i Përgjithshëm i Fondit të Sigurimit të Detyrueshëm të Kujdesit Shëndetësor, Astrit Beci jep dorëheqjen e parevokueshme, pas skandalit të abuzimit me ilaçet e rimbursueshme.
Në një deklaratë për mediat, Beci tha se e jepte dorëheqjen “në emër të dinjitetit personal, në shprehje të përgjegjshmërisë institucionale dhe me dëshirën për t’i hapur plotësisht rrugën çdo hetimi…”.
Dorëheqja e Astrit Becit vjen pas një hetimi penal të Prokurorisë për një skemë gjigande abuzimi me ilaçet e rimbursueshme, ku ishin përfshirë farmaci fantazmë dhe zyrtarë të FSDKSH.
Më 5 qershor 2015, me urdhër të Prokurorisë u arrestuan nëntë persona, mes të cilëve edhe drejtori i Fondit për Tiranën, Pjerin Xhuvani. Hetimi i deritanishëm ka zbuluar se katër farmaci të parregullta në periferi të Tiranës kishin përfituar 56 milionë lekë nga FSDKSH, duke përdorur receta të falsifikuara mjekësh.
Por një investigim i BIRN zbuloi se “gropa” e skandalit ishte trefish më e thellë dhe se në skemë dyshohet të jenë përfshirë edhe zyrtarë të lartë të FSDKSH.
Një raport i Njësisë së Kontrollit të Brendshëm dhe Antikorrupsionit pranë Kryeministrisë, NJKBA ka zgjeruar rrethin e farmacive që kanë përfituar në mënyrë të paligjshme para nga Fondi, duke llogaritur një dëm që shkon deri në 150 milionë lekë.
Hetimi administrativ ka zbuluar gjithashtu se zv.drejtori i Përgjithshëm, Sokol Skura është në konflikt interesi, pasi tre farmacitë e të afërmve të tij kanë përfituar shuma të konsiderueshme parash nga fondi i rimbursimit. Gjatë muajit prill 2015, tre farmacitë e të afërmve të tij ishin mes 15 përfituesve më të mëdhenj në Tiranë.
Skura u është shmangur komenteve, por shefi i tij, Astrit Beci thotë në tekstin e dorëheqjes se inkurajon institucionet e drejtësisë që t’i shkojnë deri në fund kësaj çështjeje.
Pas urdhër-arresteve për nëntë të implikuarit e parë, Prokuroria ka zgjeruar rrethin e hetimeve për abuzimin me fondin e ilaçeve të rimbursueshme.
Një burim nga Prokuroria i tha BIRN se rrethi i të hetuarve për këtë aferë mund të shkojë mbi 50 persona.