Pavarësisht progresit të bërë nga Serbia për integrimin në BE, kryeministri serb Vuçiç pretendon se vendi i tij është “shantazhuar” në lidhje me Kosovën.
Kryeministri serb ka shprehur shqetësimin se procesi i anëtarësimit të Serbisë në BE mbetet shumë i fokusuar te marrëdhëniet me Kosovën, jo vetëm prej shqetësimit të sigurisë në rajon, ndërsa ka paralajmëruar se Beogradi nuk do të pranojë “zgjidhje të pamundura”.
Duke folur në Forumin Europian Vaçau në Austri të dielën, Vuçiç theksoi se stabiliteti rajonal mbetet prioriteti kryesor i Serbisë dhe vuri re se kishte “shumë sinjale shqetësuese” të cilat sipas tij, zbulojnë çështje më të mëdha sesa ato mes serbëve dhe shqiptarëve të Kosovës.
“Serbia po shantazhohet me Kosovën… Procesi i shqyrtimit është kryer, por ende asnjë kapitull nuk është hapur [në pranimit e Serbisë në BE], sepse disa shtete në Europë po presin për finalizimin e disa çështjeve në lidhje me Kosovën,” tha Vuçiç.
Kryeministri serb kujtoi pjesëmarrësit në forum për përplasjet e dhunshme në Kumanovë dhe gjithashtu tha se më shumë duhet bërë për të siguruar stabilitet në Bosnje.
“Ka probleme më të mëdha se ato mes serbëve dhe shqiptarëve, megjithëse ajo marrëdhënie është shumë komplekse dhe nuk është e lehtë të identifikohen dhe të zgjidhen të gjitha problemet,” përfundoi Vuçiç.
Sipas kryeministrit serb vendi i tij ka përmbushur tashmë disa reforma ekonomike të vështira, ka bërë progres në dialogun me Prishtinën dhe e di se më shumë duhet bërë për të arritur standardet e BE-së.
Vuçiç beson se BE-ja do t’i hapë negociatat me Serbinë së shpejti, por shtoi se varet nga raundi tjetër i negociatave Beograd-Prishtinë, parashikuar për 23 qershor në Bruksel.
“Serbisë nuk do t’i bëhet presion”
Megjithëse bisedimet e nivelit teknik janë ende në zhvillim, takimi i 23 qershorit në Bruksel është i një niveli më të lartë pasi Vuçiç do të takohet me homologun e tij, Isa Mustafën.
“Ne së shpejti do të kemi mundësinë të hapim kapitujt e pranimit në BE – ndoshta më shpejt nga ç’e presin njerëzit. Por, nëse Prishtina nga ana tjetër mendon se është një mënyrë për të na ushtruar presion, për të na ofruar zgjidhje që janë të pamundura, ne nuk do t’i pranojmë,” paralajmëroi Vuçiç.
Bisedimet Beograd-Prishtinë janë të përqendruara në katër çështje kyçe: krijimi i komunave të komunitetit serb, telekomunikacionet, energjia dhe ura mbi lumin Ibar, që lidh pjesët e ndara të Mitrovicës në veri të Kosovës.
Sipas kryeministrit serb komunat e popullatës së tij janë çështje me rëndësi, duke shtuar se Prishtina ka kërkuar që ato të drejtohen si një organizatë jo-qeveritare, gjë që Beogradi e sheh të papranueshme.
Këshilli Europian i dha Serbisë statusin e vendit kandidat më 1 mars 2012. Në qershor 2013, BE-ja vendosi hapjen e bisedimeve të pranimit, por asgjë nuk ka përparuar pasi BE-ja ka kërkuar për më shumë progres në normalizimin e marrëdhënieve me Prishtinën.
Kosova dhe Serbia kanë lançuar dialogun për normalizimin e marrëdhënieve në mars 2011.
Në prill 2013, të dyja palët nënshkruan të ashtuquajturën marrëveshje të Brukselit për normalizimin e marrëdhënieve. Megjithatë pak marrëveshje të arritura deri më tani janë implementuar.