Partia Demokratike arriti të mbajë pushtetin në bashkinë Vorë pavarësisht investimeve të shumta politike dhe financiare të koalicionit të majtë dhe të kreut të LSI, Ilir Meta.
Partia Demokratike në opozitë arriti të ruajë pushtetin në bashkinë e vogël të Vorës në Shqipërinë qendrore në zgjedhjet e 21 qershorit 2015, pas një beteje të ashpër ku konkurruan dy biznesmenë. Fiqiri Ismaili, agronom, pronar i një kompanie që merret me importimin dhe tregtimin e inputeve bujqësore, qeveris qytezën e Vorës që nga viti 2003 dhe do ta drejtojë atë edhe për katër vitet e ardhëshme pasi fitoi pak vota më shumë se sa konkurrenti i tij, Luan Sallaku, biznesmen në fushën e ndërtimeve dhe të tregtisë, i cili konkurroi për partinë Lëvizja Socialiste për Integrim.
Bashkia e re e Vorës përfshin edhe njësitë administrative të Prezës dhe Bërxullës.
Në zgjedhjet e vitit 2013, në njësitë që përbëjnë bashkinë Vorë, e djathta kishte një avantazh të vogël në krahasim me të majtën. E majta rezultoi të ketë marrë më shumë vota në zgjedhjet e së dielës, por gjithsesi, jo mjaftueshëm për të marrë drejtimin e kësaj bashkie.
Vora përjetoi një nga garat më të ashpra dhe më të tensionuara elektorale me akuza të shumta të ndërsjellta për blerje votash dhe ku rreziku për dhunë qe i lartë. Të dy kandidatët dukej se kryen një fushatë shumë të kushtueshme ku rrugët e qytetit dhe të fshatrave u mbushën me flamuj e me posterë të pamundur. Vora u kthye edhe në një garë të rëndësishme për Partinë Lëvizja Socialiste për Integrim, e cila shpresoi të poziciononte veten për zgjedhjet e vitit 2017 por që duket se po dështon në shumicën dërrmuese të garave.