Liderët e Serbisë dhe Kosovës vazhduan të martën bisedimet e ndërmjetësuara nga BE-ja me fokus energjinë, komunikimin, Mitrovicën dhe Lidhjen e Komunave Serbe në Kosovë.
Zyra e shefes së çështjeve të jashtme të BE, Federica Mogherini tha më 19 qershor se një raund i ri bisedimesh Kosovë-Serbi do të përqendroheshin në zbatimin e marrëdhënieve mbi energjinë, telekomunikimin dhe krijimin e Lidhjes së Komunave serbe në Kosovë.
Dy liderët do të diskutojnë gjithashtu barrikadën mbi urën në qytetit verior të Kosovës, Mitrovicë.
Një burim pranë skuadrës negociuese të Serbisë tha për BIRN më 22 qershor se disa marrëveshje mund të arrihen.
“Mund të jetë e mundur të arrihet një lloj marrëveshje në lidhje me urën në Mitrovicë megjithëse dyshoj se mund të hapet për kalim makinash në këtë pikë,” tha burimi.
Marrëveshjet mbi sistemin e energjisë në Kosovë dhe Lidhjen Serbe të Komunave do të jetë gjithashtu e vështirë.
“Lidhja është një prioritet për ne, meqënëse është thelbësore për mbijetimin e serbëve të Kosovës. Ne nuk mund ta lëmë të bëhët një Lidhje pa autoritete të vërteta, siç do të donte Kosova,” tha burimi serb për BIRN.
Nga ana tjetër zyrtari i AAK Besnik Tahiri mbeti i mendimit se nuk duhej firmosur marrëveshje që i jepte Lidhjes fuqi ekzekutive sepse kjo do të limitonte sovranitetin e Kosovës dhe do të komprometonte kushtetutën.
Mosmarrëveshja për urën në Mitrovicë ka vazhduar prej vitesh. Kosova do që ajo të rihapet për makinat sa më shpejt të jetë e mundur ndërsa ana serbe është më e matur.
Media kosovare shprehet se një marrëveshje e mundshme mund të përfshijë heqjen e barrikadës, të cilën serbët e quajnë një park.
“Përfaqësuesit e BE në Kosovë janë takuar me përfaqësuesit e Veriut dhe Jugut të Mitrovicës dhe propozuan largimin e parkut nga ura, drejt veriut,” raportoi e përditshmja “Koha Ditore”.
Një marrëveshje e tillë do të thoshte se parku do të hiqej nga ura, por do të bllokonte ende kalimin e makinave.
Valon Murtezaj, një këshilltar i kryeministrit Isa Mustafa tha se rezultati mbi çështjen e urës së Mitrovicës varet kryesisht nga BE-ja.
Të dyja palët ndërkohë janë në dijeni të faktit se rezultati i bisedimeve mund të ndikojë aspiratat për anëtarësim në BE.