Gjykata e Arbitrazhit të Sportit, CAS, ka njoftuar se Shqipëria ka fituar në tavolinë ndeshjen e ndërprerë për shkak të dhunës në Beograd, pasi ka arritur në përfundimin që lojtarët shqiptarë nuk refuzuan kurrë rifillimin e lojës.
Sipas CAS vendimi i UEFA-s kundër Federatës Shqiptare të Futbollit, FSHF, bazohej në pretendimin se lojtarët e kombëtares Shqiptare refuzuan të rifillonin lojën pasi ndeshja u ndërpre në minutën e 41 kur një numër fishekzjarrësh u hodhën në fushë. Gjatë ndalimit të lojës, një grup prej 15 tifozësh Serb pushtuan fushën dhe sulmuan futbollistët shqiptarë.
“Megjithatë, paneli i CAS ka gjetur që nuk ka prova që FSHF refuzoi të luante pas një urdhri të arbitrit,” thotë gjykatë nëpërmjet një njoftimi për shtyp. “Paneli i CAS nuk mundi të konstatojë që arbitri i dha një urdhër të qartë dhe direkt lojtarëve për të rifilluar lojën në bazë të një vendimi përfundimtar që siguria në fushë ishte e garantuar,” shton gjykata.
Sipas panelit të gjyqtarëve të CAS, ndërprerja dhe mbyllja e ndeshjes erdhi si pasojë “e mungesës së sigurisë nga organizatorët dhe akteve të dhunës kundër lojtarëve shqiptarët nga tifozët Serbë.”
Ndeshja e parë e futbollit pas shumë dekadash mes Shqipërisë dhe Serbisë përfundoi në kaos dhe dhunë në minutën e 41, pasi një avion i telekomanduar minidrone me një banderolë me simbolet kombëtare shqiptare fluturoi mbi fushë dhe tifozët serbë shpërthyen.
Banderola e fluturuar me dron paraqiste një hartë të “Shqipërisë së Madhe” të mbuluar me një flamur shqiptarë dhe me portretet e dy baballarëve themelues të Shqipërisë, Ismail Qemali dhe Isa Boletini.
Pasi futbollisti serb Stefan Mitroviç kërceu për të kapur banderolën një përleshje pasoi mes dy skuadrave kur lojtarët shqiptarë ia rrëmbyen banderolën Mitroviçit.
Përleshja u kthye në sherr kur një grup huliganësh serbë zbritën në fushë dhe goditën lojtarët shqiptarë, duke e shtyrë arbitrin britanik Martin Atkinson të pezullojë ndeshjen. Rezultati qe 0:0 në atë moment.
Videot dhe fotografitë tregojnë tifozë serbë duke sulmuar futbollistët shqiptarë me grushte dhe shkelma dhe lojtarët serbë që përpiqen t’i mbrojnë ata.
Tifozët serbë hodhën gjithashtu fishekzjarrë dhe çakmakë ndaj lojtarëve shqiptarë ndërsa këta të fundit u larguan nga fusha.
Në një deklaratë në Twitter, kryeministri Edi Rama e vlerësojë vendimin e gjykatës së arbitrazhit.
“Supeeeer! Ja ç’dmth drejtësi europiane! 3 pike për Kombëtaren Kuqezi ne Beograd!!!” Rama shkruan.