Pas disa muajsh protestash kundër reformës së debatueshme të arsimit të lartë, studentët planifikojnë një tubim të fundit para parlamentit të martën, ndërkohë që deputetët votojnë për projektligjin.
Lëvizja Për Universitetin, grupimi i majtë i cili ka qenë në ballë të protestave kundër projektligjit të arsimit të lartë, i kërkoi studentëve të mblidhen të martën pasdite para parlamentit, edhe pse ata tashmë kanë filluar pushimet e verës.
“Kundër kalimit të reformës që – siç e kemi theksuar për muaj me radhë në asamble, zaptime dhe protesta – tregtarizon universitetin, rrjep studentët dhe abuzon me paratë publike përmes financimit të privatëve,” tha lëvizja në njoftimin për shtyp.
“Kundër arrogancës qeveritare që përmes heshtjes dhe gënjeshtrës, zvarritjes dhe nënshtrimit, panikut dhe pushimeve verore, arriti të kalonte një ndër reformat më klienteliste dhe të kundërshtuara publikisht,” shtoi ajo.
Organizatorët e protestës shpjeguan se do të mblidhen të martën në orën 17:00 përpara parlamentit për të lëshuar thirrjet e fundit ‘kundrejt atyre që duhet të jenë përfaqësuesit e interesit publik, deputetëve, që të ngrihen në lartësinë e detyrës duke refuzuar miratimin e reformës.’
“Në të kundërt, paralajmërojmë se vjeshta do të na gjejë të barrikaduar në rrugë, fakultete dhe konvikte,” kërcënuan ata.
Ligji i qeverisë së majtë për Arsimin e Lartë u miratua në qeveri, pas një rrugëtimi të gjatë përgatitjesh dhe konsultimesh. Megjithatë, komisioni i ngritur për të realizuar reformën nuk arriti të sigurojë konsensusin e të gjithë aktorëve të sistemit.
Pika më e debatueshme është skema e financimit, pasi projektligji synon të kthejë në universitete publike, entet shtetërore dhe ato private të Arsimit të Lartë. Ai parashikon gjithashtu që paratë nga buxheti i shtetit t’u akordohen studentëve dhe ata mund të zgjedhin më pas se cilin universitet do të ndjekin.
Kundërshtive të studentëve kundër projektligjit të hënën iu bashkua dhe opozita. Pas një tryeze të organizuar me pedagogët, kreu i Partisë Demokratike Lulzim Basha u angazhua ta kundërshtonte ligjin.
“Me këtë akt, Edi Rama u fshin të drejtën kushtetuese të rinjve shqiptarë për t’u arsimuar, duke ua bërë të pamundur këtë të drejtë themelore,” tha ai.
“Edhe pse studentët janë kundër, edhe pse maturantët janë kundër, edhe pse prindërit janë kundër, edhe pse stafet akademike të universiteteve publike janë kundër, edhe pse mbarë opinioni publik është kundër kësaj nisme, edhe pse ekspertët më në zë të angazhuar nga vetë qeveria janë shprehur kundër, Edi Rama ka vendosur të shkojë në këtë drejtim të rrënimit të studentëve dhe universitete publike të vendit,” shtoi Basha.
Megjithatë, në fjalën e tij në tryezën e organizuar nga opozita, ish deputeti i Partisë Demokratike dhe njëkohësisht pedagog në Universitetin e Tiranës, Mark Marku, u shpreh skeptik ndaj qasjes së opozitës ndaj projektligjit.
“Opozita në raport me këtë projektligj ka qenë hezituese dhe nuk ka kuptuar rrezikun që po i vjen sistemit të arsimit të lartë,” tha ai. “Është e tmerrshme që një grup interesi me pak para dhe shumë perversitet të implementojë interesat e veta,” shtoi Marku.
Sipas Arlind Qorrit, profesor i shkencave politike në Universitetin e Tiranës, ‘reforma në arsimin e lartë, të cilën qeveria po e kalon tinëzisht kur universitetet po mbyllen, është produkt i përpjekjeve të disa qeverive për të avantazhuar ata që universitetet i kanë edhe juridikisht “pronë private”, si të ishin bahçe me speca.’
“Qeveria e shkuar i licenconte, u shiste a jepte me qira qesharake troje e ndërtesa publike, u shtonte klientët duke shtyrë punonjësit e shtetit të bënin mastera, me propozim të opozitës së djeshme u hiqte edhe tatimin mbi vlerën e shtuar (në një vend ku lypësi paguan 20% për bukë),” shkruan Qorri në një postim në Facebook.
“E sotmja u lehtëson konkurrencën duke mbyllur vetëm ato diplomore që i shesin diplomat pa bërë reklamë, rrit edhe më shumë tarifat studentore dhe pakëson kuotat në universitetet publike,” shton ai.
Kritik i mprehtë ndaj projektligjin të arsimit të lartë ka qenë dhe profesor Artan Fuga.
“Unë vazhdoj t’i qëndroj mendimit të patundur se nesër do të jetë një ditë e zeze për arsimin tonë kombëtar dhe këtë do ta provojë koha shumë shpejt,” shkruan ai në një postim në Facebook të hënën.
Në një postim tjetër pak ditë parë, Fuga nënvizonte që edhe mes deputetëve të maxhorancës kishte kundërshti për projektligjin.
“Nuk është ndonjë meritë të aprovosh një projektligj për arsimin e lartë duke përfituar nga fakti rastësor dhe i përkohshem se ke pushtetin në dorë në një komision parlamentar dhe ke shumicën atje,” shkruan ai.
“Mua me vjen vetëm keq për ata deputetë që ndryshe flasin kur janë në një lloj intimiteti personal miqsh dhe kolegësh dhe ndryshe votojnë apo flasin kur vjen çasti i vendimit,” përfundon ai.
