Genci Drita u dënua me 8 vjet burg për veprën penale të korrupsionit, duke shtuar numrin e pakët të zyrtarëve vendorë që marrin dënime në gjykatë për abuzimet me detyrën.
Genci Drita, ish-kryetari i komunës së Bërzhitës u dënua me 8 vjet burg nga Gjykata e Krimeve të Rënda për veprën penale të korrupsionit. Sipas vendimit të gjykatës, dënimi i tij ulet në 5 vjet e katër muaj, pasi ish-kryekomunari ka përfituar gjykim të shkurtuar.
Bashkë me Dritën, Gjykata e Krimeve të Rënda dënoi edhe ish-varësin e tij, Armando Burri, i cili në kohën e nisjes së hetimit drejtonte zyrën e tatim-taksave të komunës. Ai mori një dënim prej 3 vitesh burg.
Ish-kryetari i komunës Bërzhitë, Genci Drita u procedua nga prokuroria, pasi u denoncua për marrjen e 4500 eurove rryshfet. Në hetim u përfshi edhe një kallëzim i Inspektoriatit të Deklarimit dhe Kontrollit të Pasurive, që e akuzonte Dritën për fshehjen e rreth 2 milionë dollarëve pasuri.
Emri i tij gjendej gjithashtu në listën e Prokurorisë për vitin 2014, si pjesë e betejës antikorrupsion ndaj zyrtarëve qendrorë dhe lokalë.
Së bashku me Dritën, Prokuroria hapi çështje dhe akuzoi për veprën penale të korrupsionit edhe 20 të zgjedhur të tjerë vendorë. Megjithatë, një analizë e botuar nga BIRN në janar 2015 tregon se vetëm një numër minimal çështjesh u konfirmuan në gjykatë.
Gjatë vitit 2014, vetëm dy kryetarë të njësive vendore u dënuan me vendime minimale, ndërsa ish-kryetari i bashkisë së Vlorës, Shpëtim Gjika u shpall i pafajshëm.
Të zgjedhurit e tjerë vendorë gjenden në faza të ndryshme hetimore në Prokurori apo gjykatë, ku e shkuara ka treguar që vetëm një pjesë e vogël vuajnë dënimet për veprën penale të korrupsionit.
