Ministrat e Brendshëm të Malit të Zi, Bosnjë dhe Hercegovinës, dhe Serbisë thanë që ISIS është një kërcënim i vërtetë që mund të luftohet vetëm përmes bashkëpunimit mes shërbimeve të sigurisë rajonale.
Ministrat e Brendshëm të tri shteteve të Ballkanit mbajtën një mbledhje në Podgoricë të martën për të diskutuar kërcënimin nga lëvizje radikale islamike në rajon dhe mënyrat për ti parandaluar përmes përpjekjeve të përbashkëta.
“Ne jemi pajtuar që nuk do të lejojmë terrorizmin të shpërndahet në rajon dhe ne jemi gati ta shkatërrojmë atë,” iu tha gazetarëve Ministri i Brendshëm i Bosnjës, Dragan Mektic.
Vendet e rajonit e kanë rritur nivelin e sigurisë dhe kanë prezantuar masa parandaluese të reja për të kundërshtuar kërcënimet e ISIS.
Këto masa u prezantuan pasi që ISIS më 5 qershor publikoi një video ku nxiste mbështetësit e tyre në Ballkan të vrasin “jobesimtarët” në shtetet e tyre.
Mektic tha që Bosnja dhe Hercegovina nuk është qendër për trajnim ushtarak dhe rekrutim dhe që thashethemet që 4,000 qytetarë të Bosnjës janë pjesë e ISIS nuk janë të vërteta.
Por ai tha që rreth 300 njerëz nga shteti i tij po luftojnë në Siri dhe Irak. 50 boshnjakë janë kthyer nga betejat e Lindjes së Mesme, ndërkohë që 30 janë vrarë aty, shtoi ai.
Mektic tha që anëtarët e lëvizjes Vahabiste gjithashtu janë një kërcënim për sigurinë rajonale dhe që disa prej tyre mund të rekrutohen për luftëra të huaja.
Ministri i Brendshëm serb Nebojsa Stefanovic tha në një konferencë shtypi të përbashkët që Islami radikal është një fenomen i ri në rajon dhe që policia dhe qeveria “duhet të sigurohen…që qytetarët të ndjejnë siguri dhe qëndrueshmëri”.
“Ne kemi bashkëpunim të afërt me policinë malazeze,” tha Stefanovic, duke shtuar që “në shumë raste dy forcat policore punojnë si një e vetme”.
I pyetur për sulmin mbi kryeministrin serb Aleksandar Vucic në 20 vjetorin e masakrave të Srebrenicës më 11 korrik, ministri boshnjak Mektic tha që policia ka identifikuar 20 persona që ishin të përfshirë në atë incident.
“Shërbimet tona kanë identifikuar gati 20 persona për të cilët ka dëshmi që janë të përfshirë në sulmin mbi kryeministrin Vucic,” tha Mektic.
Ai tha që policia boshnjake ka kërkuar nga kolegët e tyre serb që të ndihmojnë sepse disa nga të dyshuarit janë shtetas të Serbisë.
Vucic u sulmua ndërkohë që po kalonte përmes një turme njerëzish në Srebrenicë, ku disa prej tyre e gjuajtën me gurë dhe shishe uji para se ai të largohej me shpejtësi me ndihmën e sigurimit.
