Pas një jave takimesh intensive, grupi i krijuar për zbatimin e marrëveshjes për zgjidhjen e krizës politike në Maqedoni po merr dy javë pushime verore.
Grupi i punës ndërpartiak që po funksionon nën drejtimin e ish-deputeti belg dhe eksperti Peter Venhoutte ka ndalur punën për reformat kyçe dhe po merr pushimin veror deri më 17 gusht.
Javën e shkuar, disa përfaqësues të lartë të partive në konflikt në Maqedoni të ndihmuara nga Vanheute diskutuan për rritjen e fuqive ligjore në disa zyra kyçe të shtetit si Komisioni Shtetëror Elektoral, Agjencia Rregullatore për Median, Byronë e Sigurisë Publike dhe Zyrën Publike të të Ardhurave.
Megjithatë, përtej diskutimit të një propozimi për të kufizuar votimin në diasporë dhe për të prezantuar një mënyrë të re të votimit, duke i regjistruar paraprakisht votuesit përpara mbajtjes së votimeve, asgjë konkrete nuk u arrit.
Darko Aleksov, kreu i OJQ-së MOST, e cila ka monitoruar procesin zgjedhor në vend dhe këshillat e të cilës u morën parasysh nga grupi, tha se kjo do të pakësonte përfshirjen shtetërore në procesin elektoral.
“Kjo do të thotë se shteti nuk do të ketë më detyrën të regjistrojë votuesit. Në vend të kësaj votuesit do të regjistrohen vetëm brenda një periudhe kohore përpara zgjedhejve,” tha Aleksov.
Forcimi i organeve të rëndësishme shtetërore shihet si një hap themelor për përmirësimin e standardeve demokratike për të pasur zgjedhje të drejta në prillin e ardhshëm.
Me ndihmën e James Hamilton, ish-drejtor i prokurorisë së Irlandës, përfaqësuesit e partisë gjithashtu diskutuan detajet e formimit të një prokurorie të re autonome që do të ngarkohet me detyrën e hetimit të pretendimeve për shkeljet e qeverisë që dolën në shesh nga skandali i përgjimeve masive.
Kriza politike në Maqedoni rrotullohet rreth pretendimeve se lideri i VMRO DPMNE, Nikola Gruevski dhe partia e tij kanë orkestruar përgjimin e paligjshëm të 20,000 personave.
Gruevski ka këmbëngulur se përgjimet kompromentuese janë false dhe se janë krijuar për të destabilizuar vendin.
Përgjimet duket se po zbulojnë përfshirjen direkte të qeverisë në mashtrimin me zgjedhjet, problemet në sistemin gjyqësor dhe lirinë e shkelur të medias.
Më 15 korrik, pas bisedimeve maratonë në Shkup, Komisioneri i BE për Zgjerim, Johannes Hahn lajmëroi se një marrëveshje ishte arritur mes partive politike maqedonase për t’i dhënë fund mosmarrëveshjeve.
Pakti parashikon që qeveria të japë dorëheqjen që të lejojë betimin e qeverisë së re më 15 janar 2015, 100 ditë përpara zgjedhjeve parlamentare të 24 prillit.
Si pjesë e marrëveshjes, liderët politikë ranë dakord të formojnë grup pune për të zbatuar ndryshimet madhore në personel dhe për të nxitur pushtetin e zyrave të rëndësishme shtetërore.
