Shtatë anëtarët e KQZ votuan unanimisht për rezultatin e zgjedhjeve vendore, por përfaqësuesit e PS dhe PD nuk bien dakord për plotësimin e standardeve.
Komisioni Qendror i Zgjedhjeve çertifikoi në unanimitet rezultatin e zgjedhjeve të 21 qershorit, megjithëse në mbledhjen e së hënës nuk mungoi debati mes përfaqësuesve të PS dhe PD për plotësimin e standardeve.
Kryetarja e KQZ, Lefterije Luzi tha në një deklaratë për mediat se procesi ishte kompleks, por “funksionimi i plotë i trupës së KQZ kontribuoi në ngritjen e infrastrukturës zgjedhore korrekte, transparente dhe të besueshme nga të gjitha palët”.
Zgjedhjet vendore të 21 qershorit u realizuan me hartën e re territoriale me 61 bashki, por kryetarja Luzi tha se Komisioni Qendror i Zgjedhjeve arriti të krijonte infrastrukturën e nevojshme funksionale.
Ajo cilësoi si progres përfundimin brenda 4 ditësh të procesit të numërimit, gjatë së cilit nuk u shënuan braktisje të detyrës nga komisionerët apo numëruesit, siç ka qenë traditë në vitet e shkuara.
Zgjedhjet vendore të 21 qershorit morën vlerësime, por edhe kritika nga vëzhguesit ndërkombëtarë. Në raportin paraprak, të publikuar më 22 qershor, misioni i OSBE/ODHIR tha se “mungesa e vullnetit politik dhe politizimi i institucioneve ishte sërish i dukshëm”.
OSBE/ODHIR evidentoi gjithashtu se gjatë fushatës elektorale pati akuza të ndërsjellta për presion mbi zgjedhësit si dhe raste të përdorimit të fondeve shtetërore për fushatë. Vendimmarrja e Komisionit Qendror të Zgjedhjeve u konsiderua gjithashtu e politizuar.
Përfaqësuesi ligjor i Partisë Socialiste në KQZ, Genci Gjonçaj tha se qeveria i përmbushi detyrimet e saj në zgjedhje.
“Këto ishin zgjedhjet më të mira. Qeveria nuk ushtroi presion mbi KQZ dhe institucionet e tjera,” tha Gjonçaj.
Por Gjonçaj u kundërshtua nga përfaqësuesi i Partisë Demokratike në Komision, Njazi Kosovrasti, i cili tha se certifikimin e standardeve e bën misioni i OSBE/ODHIR.
“Përfaqësuesi i qeverisë i bën elozhe qeverisë. Ky është falsitet. Të presim raportin e OSBE/ODIHR për të thënë që ishin zgjedhjet më të mira,” tha ai.
Në zgjedhjet vendore të 21 qershorit morën pjesë 63 parti politike, nëntë prej të cilave konkurruan jashtë dy koalicioneve të mëdha. Koalicioni i majtë, ASHE fitoi 45 bashki, ndërsa koalicioni i djathtë, APPD mori timonin e drejtimit në 16 bashki.
