Maqedonia deklaroi gjendjen e emergjencës në kufirin jugor dhe verior pas një fluksi të paprecedent refugjatësh.
Maqedonia ka lajmëruar se do të dërgojë trupa në kufirin me Greqinë, në një përpjekje për të frenuar hyrjen dhe lëvizjen e refugjatëve në vend.
Synimi është të kontrollohet kufiri, shpjegoi të enjten zëdhënësi i ministrisë së brendshme, Ivo Kotevski.
“Vendimi synon të parandalojë probleme serioze dhe kërcënime të mundshme ndaj popullatës vendase në Gevgelija [qytet pranë kufirit grek]… dhe gjithashtu parashikon të ofrojë trajtim të duhur për refugjatët që hynë në Maqedoni dhe që kanë shprehur pretendimin për azil,” shtoi ai.
Kotevski tha për BIRN se kufiri nuk do të mbyllet dhe se kalimi përmes pikave ligjore mbetet i hapur. Ai nuk sqaroi nëse refugjatët e ngecur në kufi do të lejohen të hyjnë.
“Jemi në dijeni se kontrolli i shtuar në kufirin jugor nuk është zgjidhje finale për problemin,” tha ministria e brendshme, duke bërë thirrje për një ndërhyrje të BE-së, “e cila do të mbulojë shtetet më të prekura nga kriza dhe do të ndajë barrën e krizës me solidaritet”.
Qeveria e justifikoi vendimin pas presionit të ardhur nga migrantët në kufirin jugor.
Gjatë 24 orëve të fundit, nga e mërkura në të enjte, ministria e brendshme lëshoi 1327 certifikata për refugjatët.
Në dy muajt e fundit, 41,414 të huaj kanë kërkuar azil.
Sipas llogarive zyrtare, autoritetet vendase kanë shpenzuar 800,000 euro në muaj për të ndihmuar sigurinë në kufirin jugor.
Ndërkohë, OJQ-të e pranishme në kufi thonë se 1500 refugjatë kanë ngecur në tokën neutrale mes Maqedonisë dhe Greqisë.
OJQ-ja Legis, e cila ndihmon migrantët me ushqim, ujë dhe ilaçe thotë se është e zhgënjyer nga vendimi i qeverisë.
Refugjatët e shohin Maqedoninë dhe Serbinë vetëm si një rrugë tranzit për në Europën Perëndimore, ndaj Maqedonia më herët lehtësoi kontrollin për migrantët, duke i lejuar atyre një kalim 72-orësh të pa shqetësuar.
