Policia maqedonase të premten hodhi gaz lotsjellës kundër refugjatëve që përpiqeshin të hynin në vend, një ditë pasi lajmëroi gjendjen e krizës në kufirin grek.
Policia maqedonase qëlloi me gaz lotsjellës turmat e refugjatëve në kufirin grek të premten, për t’i ndaluar atyre hyrjen në vend. Filmimet video shfaqin disa refugjatë të plagosur.
Ditën e mëparshme qeveria maqedonase deklaroi një gjendje emergjence në kufijtë jugor dhe verior pas një fluksi të paprecedent refugjatësh.
Ministri i brendshëm tha se po dërgonte trupa në kufirin me Greqinë, në një përpjekje për të kufizuar valën e refugjatëve që hyjnë dhe dalin nga vendi.
Synimi ishte të kontrollohej zona e kufirit, shpjegoi të enjten Ivo Kotevski, zëdhënës i Ministrisë së Brendshme.
Gabriela Andreeska, nga OJQ-ja Legis, tha se të enjtën në mbrëmje rreth 100 refugjatë ia dolën të kalojnë kufirin dhe të hyjnë në Maqedoni përmes pikave të të paligjshme të kalimit, por ato më pas u shoqëruan në zonën mes dy kufijve.
“Situata ishte e tmerrshme. Meqënëse ata refugjatë ishin në territorin maqedonas, policia duhet t’i pajiste me certifikata për qëllim të kërkimit të azilit, që atë të mund të udhëtonin më tej,” tha ajo. “Por kjo nuk ndodhi. Ata i futën në furgona dhe i kthyen në Greqi”.
Ajo shtoi se një nga refugjatët u dërgua në spital pasi u rrëzua në territorin maqedonas. Mjekët konfirmuan më pas se emigranti pati pësuar një krizë epilepsie.
Në dy muajt e fundit, 41,414 të huaj kanë hyrë në Maqedoni në rrugën e tyre drejt Europës Perëndimore.
Refugjatët shohin Maqedoninë dhe Serbinë si rrugën e vetme tranzit për në Europën Perëndimore dhe kjo është arsyeja se pse Maqedonia më herët lehtësoi kontrollet për emigrantët duke i lejuar ata të qëndrojnë 72 orë në këtë territor për të kaluar vendin të papenguar.
Bashkimi Europian as nuk i ka miratuar dhe as nuk i ka dënuar kontrollet e reja në kufirin me Maqedoninë. Maqedonia ka të drejtë sipas ligjit ndërkombëtar të monitorojë njerëzit që dëshirojnë të hyjnë në territorin e saj dhe t’i refuzojë hyrjen atyre që nuk plotësojnë kushtet, deklaroi zyra e Komisionerit të BE-së për Fqinjësinë dhe Zgjerimin Johannes Hahn të premten.
“Komisioni ka mësuar mbi vendimin e qeverisë për të deklaruar një situatë emergjence në zonat përgjatë kufijve të vet jugor dhe veriorë. Komisioni është i gatshëm të vijojë të japë ndihma humanitare për Maqedoninë.”