Austria apel BE-së të ndihmojë në krizën e migrantëve në Ballkan

Ministri i jashtëm austriak Sebastian Kurz tha se shtetet e Ballkanit perëndimor kanë nevojë urgjente për ndihmë në përballimin e fluksit të madh të refugjatëve nga Lindja e Mesme dhe Afrika.

Kurz tha të hënën gjatë një vizite në Maqedoni se Ballkani perëndimor ka nevojë urgjente për ndihmë nga Bashkimi Europian që t’ia dalë mbanë me krizën humanitare të shkaktuar nga numri i madh i refugjatëve që hynë në Maqedoni dhe Serbi gjatë rrugës për në BE.

“Shtetet në Ballkanin perëndimor janë lënë vetëm. Ato kanë nevojë për ndihmën tonë,” tha Kutz pasi vizitoi një kamp refugjatësh pranë qytetit Gevgelija, një pikë e madhe hyrëse për refugjatët dhe migrantët pranë kufirit jugor të Maqedonisë me Greqinë.

Kurz tha se BE-ja duhet të t’i shohë dhe t’i trajtojë të gjithë refugjatët me barazi, përfshirë ata që kalojnë nga Greqia në Maqedoni, Serbi dhe Hungari dhe të mos përqendrohet vetëm te ata që hyjnë nga Italia.

Normalizimi gradual i itinerarit tranzit të migrantëve përgjatë Maqedonisë vjen pas dy ditëve tensione në kufirin jugor me Greqinë. Të premten dhe të shtunën policia maqedonase qëlloi me gaz lotsjellës ndaj shumë migrantëve që kapërcyen kufijtë e vënë nga policia për të hyrë në vend.

Organizata e të drejtave Amnesty International dënoi atë që e quajti përdorim të masave paraushtarake për të larguar refugjatët.

Situata u normalizua të dielën kur Maqedonia ofroi trena dhe autobusë për të ndihmuar në transportimin e refugjatëve nga kufiri jugor në atë verior me Serbinë. Shumica prej tyre duan të kalojnë nga Maqedonia në Serbi dhe Hungari për të mbërritur në BE.

Në Gevgelija, Kurz u takua me ministrin e brendshëm maqedonas Mitko Cavkov dhe më pas shkoi në Shkup për t’u takuar me homologun e tij Nikola Poposki.

Cavkov tha se policia është përqendruar në trajtimin njerëzor të refugjatëve dhe ofrimin e mbrojtjes së tyre nga grupet e organizuara që mund të përpiqen të përfitojnë nga fatkeqësia e tyre, duke këmbëngulur se deri tani policia ia ka dalë me sukses.

Agjencia e OKB për refugjatët, UNHCR, ka paralajmëruar të dielën se Greqia, Maqedonia dhe Serbia do të përballen me një tjetër fluks refugjatësh në ditët në vijim.

Ajo i ka nxitur autoritetet greke dhe maqedonase të bëjnë përpjekje shtesë për të organizuar më mirë akomodimin e refugjatëve.

UNHCR tha se BE-ja duhet të rrisë ndihmën për Serbinë, Maqedoninë dhe Greqinë.