Serbia dhe Kosova ranë dakord mbi katër marrëveshje kyçe në atë që BE-ja e quajti themelin e procesit të normalizimit që do të ndihmojë të dyja vendet në rrugën e tyre europiane.
Pas nëntë orë bisedimesh në Bruksel, kryeministri serb Aleksandër Vuçiç dhe Isa Mustafa i Kosovës, finalizuan marrëveshjet kyçe në energji, telekomunikim dhe në Lidhjen e Komunave Serbe.
Ata ranë gjithashtu dakord për urën mbi lumin Ibër, i cili ndan qytetin verior të Kosovës, Mitrovicën në pjesët serbe dhe shqiptare.
Federica Mogherini, shefja e BE-së për Çështjet e Jashtme dhe Politikat e Sigurisë, që drejtoi takimin, vlerësoi rezultatin e bisedimeve.
“Dedikimi i kryeministrave ishte thelbësor dhe unë konfirmoj se BE-ja do të mbështesë vazhdimisht zbatimin e plotë të këtij rezultati. Ne do të vazhdojmë punën në hapa të mëtejshëm të dialogut në muajt e ardhshëm,” deklaroi Mogherini.
Ajo gjithashtu lajmëroi se palët kishin rënë dakord në parimet e përgjithshme dhe në elementët kryesorë për Lidhjen e Komunave Serbe, që do të hapë rrugën për krijimin e saj.
Vuçiç dhe Mustafa kanë rënë dakord mbi zbatimin e marrëveshjes energjetike dhe në një plan veprimi për telekomunikacionin, që do të lehtësojë punën e sistemit të telekomunikacionit dhe operatorëve të tij në Kosovë.
“Rezultati i sotëm është gur themeli për procesin e normalizimit. Zgjidhjet si ato që u gjendën sot do t’i sjellin njerëzve përfitime dhe njëkohësisht do t’i japin mundësi të dyja palëve për të përparuar drejt rrugës së tyre europiane,” tha Mogherini.
Vuçiç dhe Mustafa janë gjithashtu të kënaqur me marrëveshjen. Megjithatë ata dhanë informacion të ndryshëm rreth marrëveshjeve të arritura, veçanërisht mbi Lidhjen e Komunave Serbe.
Kryeministri serb tha se u ra dakord që lidhja e komunave me shumicë serbe në Kosovë do të kishte kompetenca të gjera, përfshirë një president, zëvendës president, asamble, këshill, simbol dhe flamur.
Ndërkohë Mustafa i Kosovës, këmbënguli se nuk do të kishte kompetenca të gjera dhe se thjesht do të ndihmonte komunat me shumicë serbe në Kosovë.
Marrëveshja mbi Lidhjen, publikuar nga BE-ja, thoshte se do të jetë një entitet ligjor i përcaktuar nga një statut dhe se do të promovojë interesat e komunitetit serb të Kosovës në marrëdhëniet me autoritetet qendrore të Kosovës.
Marrëveshja parashikon se Statuti i Lidhjes do të projektohet brenda katër muajve. Vuçiç tha se ende mund të kishte telashe në negociatat për dokumentin.
Vetëvendosja e Kosovës e denoncoi marrëveshjen si të dëmshme për Kosovën, duke shtuar se do të fillojë protestat për të parandaluar formimin e lidhjes.
Sipas deklaratave, serbët në Kosovë do të kenë furnizuesin dhe shitësin e tyre të energjisë elektrike, që do të jetë një dekë e kompanisë shtetërore të Serbisë për energjinë.
Në lidhje me telekomunikimin, Kosova do të ketë një kod të ri telefonik, me shumë gjasa +383, ndërsa Telekomi serb do të ketë lejen ligjore për të punuar në Kosovë.
Sa për lëvizjen e lirë në Mitrovicë, është rënë dakord se të dyja palët do të përdorin urën në një mënyrë të pranueshme për të dyja palët.
Bisedimet në Bruksel janë parë si thelbësore për të dyja palët për shpresat e tyre në integrimin europian. Serbia shpreson të hapë kapitullin e parë të bisedimeve të anëtarësimit në BE në fund të këtij viti, ndërsa Kosova ka nevojë të bëjë progres në marrëveshjen e liberalizimit të vizave.
