Këshilli Shkencor i Instituti të Monumenteve të Kulturës e ka aprovuar ndërhyrjen e bashkisë së Tiranës tek Piramida, e cila është shpallur monument kulture dhe mbrohet me ligj, duke mos e konsideruar lyerjen e fasadës ndërhyrje estetike apo strukturore.
Sipas një shkresë të bërë publike nga bashkia Tiranë për BIRN, Këshilli Shkencor i IMK-së i ka aprovuar punimet në Qendrën Ndërkombëtare të Kulturës ‘Pjetër Arbnori,’ më 19 gusht, një javë pasi ato patën filluar.
Në vendimin e saj IMK specifikon që punimet e mirëmbajtjes e pastrimit të Piramidës, do të kryen me qëllim përgatitjen e kësaj hapësire për një aktivitet të komunitetit të Saint Egidios.
Këshilli Shkencor i IMK-së, pasi ka shqyrtuar kërkesën e bashkisë Tiranë, ka vendosur “miratimin e punimeve të mirëmbajtjes në objektin e Piramidës, pa bëre asnjë ndërhyrje strukturore apo estetike në objekt.”
Punimet e bashkisë tek Piramida, u njoftuan nga kryetari i bashkisë Erjon Veliaj më 11 gusht.
Nëpërmjet një postimi në rrjetin social Twitter, të ilustruar me tre punëtorë që lyenin fasadën e Piramidës me bojë ngjyrë gri. Veliaj njoftoi se punimet për riparimin provizor të ndërtesës dhe parkut përreth kanë filluar.
Dy ditë pas fillimit të punimeve bashkia ka njoftuar Institutin e Monumenteve të Kulturës.
Ky i fundit nëpërmjet një shkrese drejtuar drejtorit të planifikimit dhe menaxhimit të shërbimeve me datë 17 gusht, i kërkon bashkisë së Tiranës një numër dokumentash, duke nënvizuar se objekti gëzon mbrojtje si monument kulture.
IMK i ka kërkuar bashkisë t’i dërgojë relacionin teknik të punimeve, specifikimet teknike, materialin grafik, preventivin e punimeve dhe prezantimin projektit në Power Point.
Zëdhënësi i bashkisë Tiranë, Renato Kalemi, i tha BIRN se kërkesat e IMK-së patën ardhur si rrjedhojë e një keqkuptimi.
“Bashkia nuk po bën restaurim por po bën mirëmbajtje, dhe na kanë sjellë një shkresë të dytë me datë 20… ku na thonë se mund të vazhdojmë me mirëmbajtjen e Piramidës,” u shpreh ai.
Me propozimin e Komunitetit të Sant’Egidio, në bashkëpunim me kishën Katolike dhe Ortodokse në Shqipëri, në datat 6-8 shator në Tiranë do të mbahet konferenca ndërkombëtare “Paqa është gjithmonë e mundshme – Religjionet dhe Kultura e Dialogut.”
Mijëra vetë, përfshirë lider religjioz dhe ekspertë nga organizata të shoqërisë civile, pritet të mblidhen në Tiranë gjatë konferencës.
