Gjermania tha se në listën e vendeve të sigurta të origjinës ka shtuar Kosovën, Shqipërinë dhe Malin e Zi, gjë që e vështirëson shansin e fitimit të azilit në Gjermani për shtetasit e këtyre vendeve.
Të hënën Gjermania lajmëroi se Kosova, Shqipëria dhe Mali i Zi do të klasifikoheshin si ‘vende të sigurta origjine’, që do të thotë se njerëzit që shkojnë në Gjermani nga këto vende do të kthehen më shpejt dhe shumë pak do të mund të marrin azil.
Gjermania i ka kategorizuar shtetet e BE-së, plus Ganën, Senegalin, Serbinë, Maqedoninë dhe Bosnjen si ‘shtete të sigurta’, gjë që do të thotë se shtetasit e tyre kanë shumë gjasa të refuzohen.
Lëvizja erdhi pasi Gjermania të hënën zbuloi planin e parë për t’u përballë me fluksin e refugjatëve në vend.
Plani i prezantuar nga kancelarja gjermane Angela Merkel dhe zv. Kancelari Sigmar Gabriel në Berlin, përfshin buxhet më të madh dhe burime më të shumta njerëzore për t’u përballur me refugjatët, si dhe mjete të shpejtimit të aplikimeve të azilit.
Merkel tha se Gjermania do të shtojë 3 miliardë euro në buxhetin e 2016 dhe do të japë 3 miliardë të tjera për shtetet gjermane dhe komunat që po përballen me numër rekord azilkërkuesish.
Nën këtë plan, aplikimet nga shtetet e Ballkanit Perëndimor do të qëndrojnë në qendrat e pritjes paraprake, ku autoritetet do të ndihmojnë me akomodim të përshtatshëm për dimër për 150,000 persona.
Qëndrimi maksimal për refugjatët do të jetë nga tre deri në gjashtë muaj. Ata duhet të qëndrojnë në rezidencë gjatë kësaj periudhe.
Aplikantët e refuzuar do të kthehen në vendet e origjinës më shpejt se më parë.
“Kush nuk do të jetë i përshtatshëm për qëndrim të përhershëm do të largohet nga vendi,” tha Merkel, që lajmëroi se përfitimet sociale të atyre që do të largohen do të ulen.
Qeveria ka gjithashtu plan të hartojë një ligj mini-imigracioni për të ndihmuar ballkanasit.
“Ata që vijnë nga Ballkani dhe që mund të japin prova të punësimit apo një pozicioni trajnimi do të mund të punojnë këtu,” tha Kancelarja.
Ministri gjerman i punëve të brendshme, Andrea Nahles tha se në pesë vitet e ardhshme Gjermania do të ofrojë 20 mijë leje pune për gjashtë shtete të Ballkanit Perëndimor pavarësisht kualifikimit të njerëzve.
Sipas të dhënave zyrtare, rreth 40 për qind e azilkërkuesve në Gjermani janë nga Ballkani.
