Bukureshti u përgjigj se nuk do të pranojë më shumë se 1785 refugjatë dhe migrantë, pavarësisht kërkesës së Komisionit Europian për të pranuar disa qindra më tepër.
Ministri i brendshëm rumun, Gabriel Oprea tha të hënën se Bukureshti do të refuzojë planin e Komisionit Europian për kuotat kombëtare të refugjatëve.
“Kam mandat të qartë nga presidenti dhe kryeministri për të refuzuar me mirësi kërkesën e KE,” tha Opera përpara se të largohej për në Bruksel, ku ministrat e brendshëm të BE do të mbajnë një takim për krizën e refugjatëve.
“Ne do të respektojmë marrëveshjen tonë fillestare për të marrë 1785 migrantë. Ky është kapaciteti i Rumanisë,” shtoi ai.
Jean-Claude Juncker, president i Komisionit Europian, propozoi një plan të mërkurën e shkuar për pranim të 160,000 refugjatëve në BE. Propozimi i prezantuar në Parlamentin Europian shton 40,000 kuota të reja nga ato të majit.
Nën kuotat e rishikuara, Rumania do të marrë 4646 persona, Bullgaria 1600 dhe Kroacia 1064. Kuotat më të mëdha i janë dhënë Gjermanisë, me 21.443 refugjatë dhe Francës me 24,031.
Përveç planit për kuotat kombëtare, Juncker tha se shtetet e Ballkanit Perëndimor duhet të futen te vendet e sigurta të origjinës, që do të thotë se njerëizt nga këto shtete do të klasifikohen si migrantë ekonomikë dhe nuk do të marrin azil.
Këshili Suprem i Mbrojtjes në Rumani do të vendosë këtë javë se sa refugjatë do të akomodojë vendi, por numri nuk mund ta tejkalojë kapacitetin aktual të 1785 personave në gjashtë qendra pritjeje.
Rumania nuk është prekur nga vala e refugjatëve në Ballkan. Vetëm 913 persona kanë aplikuar për azil këtë vit, 12 për qind më shumë se 2014.
