Qindra refugjatë kanë filluar të kalojnë kufirin Serbi-Kroaci pasi Hungaria ka mbyllur kufirin e saj.
Pasi disa qindra refugjatë që janë shmangur nga kufiri hungarez kanë hyrë në Kroaci të mërkurën, kryeministri i vendit Zoran Milanovoiç tha se do të thërriste një takim urgjent të Këshillit Kombëtar të Sigurimit, organi qëndror për koordinim të sigurisë për të zgjidhur problemin.
Lajmi ka ardhur pasi policia në kufirin lindor të Vukovarit tha se kishte regjistruar tashmë 181 refugjatë që kalojnë kufirin. Agjencia e lajmeve Reuters citoi ministrin e brendshëm teksa raportoi se 277 refugjatë kanë hyrë në Kroaci në mëngjes.
Më herët, duke kritikuar kontrollet e kufirit të Hungarisë, Milanoviç tha se asnjë vend nuk duhet të ngrejë mure dhe tela me gjemba në Europë në shekullin 21. “Dërgon një mesazh të tmerrshëm,” tha ai.
Policia ka thënë gjithashtu se pritet që deri në fund të ditës 500 refugjatë të tjerë të kalojnë kufirin. Radio Televizioni Kroat, HRT, raportoi se 12 autobusë pritet të mbërrijnë në qytetin kufitar serb Sid për t’i marrë ata gjatë ditës. Një tren i posaçëm do të kalojë në Kroacinë lindore për të transportuar refugjatët në qendrën e refugjatëve në Zagreb.
Policia kroat është shprehur se refugjatët që kalojnë kufirin do të transportohen në një qendër regjistrimi, ku do të regjistrohen dhe lejohen për të vazhduar rrugën drejt Europës Perëndimore.
Në anën hungareze të kufirit me Serbinë, rreth 1000 refugjatë kanë mbërritur në kufi të mërkurën në përpjekje për të hyrë në Hungari përmes pikës zyrtare. Pasi policia hungareze ia mohoi hyrjen një grup u kthye në kampin e pritjes në Serbi.
Kroacia po përgatitet për të përballuar fluksin e madh të refugjatëve ndërsa një grup qytetarësh kanë krijuar një faqe në Facebook, ku udhëtzojnë migrantët për rrugën më të sigurt që duhet ndjekur.
Presidenti i Komisionit Europian, Jean Claude Juncker, ka propozuar të ndahen refugjatët nëpër shtetet e BE sipas kuotave. Propozimi i jep Kroacisë 1064 refugjatë, por vendi ka rënë dakord të pranojë edhe 550 të tjerë shtesë.
Nga ana tjetër, policia hungareze ka arrestuar qindra refugjatë që u përpoqën ta kalojnë kufirin ilegalisht dhe ka aplikuar gjendjen e emergjencës të martën për të ndaluar fluksin e refugjatëve.
Sipas raportimeve në media mbrëmjen e të martës dhe të mërkurës, një grup i madh refugjatësh kanë ngritur një kamp të përkohshëm në tokën mes Serbisë dhe Hungarisë dhe kanë protestuar që të lejohen të hyjnë. Ata kanë bërtitur “Na lini të hyjmë”, “Gjermani” dhe “Serbi”.
