Refugjatët sirianë dhe irakianë që kanë mbërritur në kryeqytetin kroat pasi Hungaria mbylli kufirin thonë se duan të vazhdojnë udhëtimin për në Gjermani në kërkim të së ardhmes në paqe dhe begati.
“Po shkoj në Gjermani për të studiuar mjekësi. Për t’u bërë një dentist,” thotë Alaa Shahwan, një 18 vjeçar, student i stomatologjisë në Alef të Sirisë, për gazetarët jashtë një qendre azili në Zagreb pasi mbërriti në kryeqytetin kroat – një nga mijëra refugjatët që kanë hyrë në vend në ditët e fundit.
Pasi Hungaria mbylli kufirin e saj me Serbinë të martën, 11,000 njerëz hynë në Kroaci gjatë të mërkurës dhe të enjtes, duke e nxitur policinë kroate që të mbyllë kufirin me Serbinë në mbrëmjen e së enjtes në një përpjekje për të kufizuar mbërritjet.
“Mos ejani më këto, qëndroni në qendrat e qëndrimit në Serbi, Maqedoni dhe Greqi. Kjo nuk është rruga për në Europë,” tha ministri i brendshëm kroat Ranko Ostojic të enjten. Kroacia ka ndaluar përkohësisht pranimin dhe regjistrimin e refugjatëve që më parë lejoheshin të vazhdonin rrugëtimin përgjatë vendit drejt Sllovenisë dhe Europës Perëndimore.
Presidentja kroate Kolinda Grabar Kitaroviç e shpjegoi lëvizjen duke thënë se gjatë “ditës së parë shumë refugjatë hynë në vend pa kontrolle,” duke shtuar se siguria e kroatëve ishte prioritet. ministri kroat i mbrojtjes Ante Kotromanovic tha se nuk ka shkak për panik, por nëse është e nevojshme ushtria kroate do të zhvendoset në kufirin me Serbinë për të mbrojtur interesat kombëtare.
Sllovenia gjithashtu ka vendosur të vendosë kufi mbi refugjatët dhe të kthejë disa qindra prej tyre në Kroaci. Hungaria ndërkohë ka deklaruar gjendjen e emergjencës në vendet përgjatë kufirit me Kroacinë, pasi bëri të njëjtën gjë me Serbinë.
Një nga refugjatët që ka mbërritur në Kroaci, i cili tha se quhej Alaa, tha se mbërriti të mërkurën në qendrën e azilit në Dugave ngjitur me Zagrebin, ku ai u regjistrua dhe mori të drejtën e lëvizjes për në Europën Perëndimore.
I pyetur përse u largua nga Siria, ai dha një përgjigje të shkurtër: “Luftë, vrasje”.
Ai shpjegoi se i ishte dashur një muaj për të mbërritur në Kroaci nga Alefi, duke kaluar në Turqi, Greqi, Maqedoni dhe Serbi. Ai shpjegoi se refugjatët kishin përdorur çdo lloj transporti: varkë, autobus, taksi dhe ecje.
“Në Serbi, një taksi mori 500 euro për një udhëtim të shkurtër,” tha ai duke shtuar se ka mjaftueshëm para për të shkuar në destinacionin e dëshiruar – Gjermani. Ai dhe refugjatë të tjerë kërkuan për lidhje interneti që të komunikonin me shtëpinë.
Pasi dërgojnë dhe marrin disa mesazhe zanore nga familja me ËhatsApp, duke thënë se ai është në Kroaci dhe është mirë, Alaa shpjegon planin e tij për t’u ribashkuar me familjen.
“Në një vit, do t’i dërgoj një ftesë dhe t’i sjell në Gjermani,” tha ai.
Një tjetër refugjat nga Siria tregon foto të familjes së tij në shtëpi dhe përsërit: “Faleminderit Kroaci”.
Jashtë qendrës së azilit, një djalë tetë vjeç nga Siria i buzëqesh kamerave teksa qëndron krah xhaxhait 18-vjeçar, Abel.
“Ne po shkojmë në Gjermani”, tha Abel.
Shumica e refugjatëve në qendër kishin pasaporta siriane dhe dokumente identifikimi, disa prej tyre, nga qyteti Idlib në veriperëndim të Sirisë, ia treguan atë refugjatëve.
Një sirian i ri shpjegoi se ai ishte një kik-bokser profesionist dhe shprehu dëshirën për ta vazhduar karrierën në Europë.
Një grup i irakianëve ndërkohë tregonin video të udhëtimit të tyre përgjatë Mesdheut në një varkë të vogël, të kapur me smartfon.
Pasi kaloi ca kohë, të gjithë refugjatët filluan të largoheshin nga qendrat dhe të vazhdonin drejt rrugës kryesore të qendrës së qytetit, me shpresën për të gjetur trena dhe autobusë që do t’i transportonin në Slloveni dhe një hap më afër Gjermanisë.