Bashkia thotë se po punon me një projekt të ri për komunikimin mes qytetarëve dhe Bashkisë, por refuzon të japë detaje mbi kostot e projektit.
Numri i gjelbër i Bashkisë së Tiranës, 0800 0888, i vënë në dispozicion të qytetarëve për të paraqituar ankesat apo dhe problematika të ndryshme, nuk funksionon. Një qytetare, e cila tentoi të përdorë këtë numër për të raportuar mungesën e ndriçimit në lagjen e vet në qendër të Tiranës solli në vëmendjen e BIRN faktit që numrit të shumëreklamuar të komunikimit të bashkisë me qytetarët nuk i përgjigjet askush.
I pyetur nga BIRN, zëdhënësi i Bashkisë së Tiranës Renato Kalemi tha se po punohet mbi një projekt për të përmirësuar komunikimin me qytetarin që do të përfundojë në fund të këtij viti.
Ndërkohë, BIRN testoi edhe sistemin online të komunikimit me qytetarët të Bashkisë së Tiranës dhe ai rezultoi gjithashtu jofunksional. Në aplikacionin që paraqitet në faqen “Si të takohesh me kryetarin e bashkisë”, kërkohet plotësimi i një formulari me premtimin se një punonjës i bashkisë do të të telefonojë për sqarime të mëtejshme. BIRN ndoqi udhëzimin por nuk u kontaktua nga asnjë punonjës bashkie pas aplikimit të bërë.
Zëdhënësi i Bashkisë refuzoi të japë detaje mbi projektin e ri të komunikimit që bashkia ka ndër mend të zbatojë si dhe nuk pranoi të ndajë kostot financiare të këtij projekti.
